Во тек се испитувањата на дете сместено во болница во Белград за кое постои сомневање дека има акутен хепатитис од непознато потекло кои ќе покажат дали во Србија пристигнал аденовирусот, кој би можел да биде одговорен за оваа болест, која е дијагностицирана кај деца во повеќе од 20 земји.
Карактеристично за болеста, исто така, е и тоа што бојата на урината станува потемна, како пиво, а столицата посветла
Симптомите на инфекција со аденовирус во еден дел може да бидат слични на другите вирусни инфекции. Српскиот педијатар д-р Саша Миличевиќ вели дека родителите треба да внимаваат на следните промени кај децата:
„Белките стануваат жолти и кожата добива жолта боја кај која било врста на жолтица, со тоа што кај оваа нова форма таа е нешто поизразена. Покрај тоа, може да се појави и покачена температура, детето може да биде малаксано, нерасположено…“
Карактеристично, исто така, истакнува педијатарот, е и тоа што бојата на урината станува потемна, како пиво, а столицата посветла.
Конечно, детето јаде помалку и спие.
Педијатарот Миличевиќ за РТС потсетува дека аденовирусот најчесто се пренесува преку нечисти раце, па затоа советот до родителите е дополнително да внимаваат и да ги предупредат децата редовно да ги мијат рацете.
Мистериозниот хепатитис најпрво се појави во Велика Британија, а потоа во Ирска, САД, Израел, Холандија, Шпанија, Данска, Италија, Норвешка, Франција, Белгија, Романија, Јапонија, Канада… Најновите информации стигнуваат од Индонезија каде што три деца починаа од новото, мистериозно заболување на црниот дроб, што доведе до најмалку четири смртни случаи од оваа болест ширум светот, пишува британски „Гардијан“.
Најраните симптоми на болеста вклучуваат гадење, повраќање, абдоминална болка и дијареја. Портпаролката на индонезиското Министерство за здравство, Надија Тармизи, рече дека децата на возраст од две, девет и 11 години, кои починале минатиот месец, развиле компликации – грчеви, треска и губење на свеста и дека им немало спас. „Во моментов сметаме дека се работи за случаи на акутен хепатитис, но се уште го истражуваме ова бидејќи се чини дека болеста не е поврзана со претходно познати случаи на хепатитис А, Б, Ц, Д или Рб“, рече Тармизи.
Професорот д-р Драган Делиќ, гастроентерохепатолог, минатата недела за српски „Телеграф“ објасни дека најверојатно зад акутниот хепатитис стои некој инфективен агенс, а првите резултати покажуваат дека се работи за аденовирус серотип 41.
Откриени двата најчести симптоми кај децата хоспитализирани поради мистериозна појава на хепатитис
Во САД се откриени двата најчести симптоми кај децата хоспитализирани поради мистериозната појава на хепатитис. Децата кои биле итно пренесени во болница со воспален црн дроб имале повраќање и дијареја.
Американскиот центар за контрола и превенција на болести минатата недела користел податоци од Алабама, каде што се пронајдени повеќето случаи во САД. Имено, сите деца кои сериозно се разболеле биле генерално здрави, без проблеми со имунолошкиот систем.
И додека најчестите знаци биле повраќање и дијареја, многу деца исто така имале симптоми на горниот респираторен тракт – како течење на носот, кивање, болки во грлото. Повеќето од нив имале зголемен црн дроб, жолтица и пожолтување во очите, пишува „Сан“.
