Труењето со храна може да биде доста непријатно и во ретки случаи фатално. Во повеќето случаи ќе ви требаат неколку дена за да закрепнете, а NHS препорачува да се одморате дома и да пиете многу вода.
Кога ќе се чувствувате доволно добро за да почнете повторно да јадете, најдобро е да се придржувате до храна која е лесна за стомакот и која лесно се вари се додека целосно не закрепнете.
Дополнително, на почувствителните луѓе, оние кои се постари или имаат други здравствени проблеми, им се препорачува да земаат раствори за рехидратација.
Ако вашите симптоми се особено тешки и никако не успевате да ја задржите течноста, вашата општа состојба не се подобрува по неколку дена или ако имате симптоми на тешка дехидратација (конфузија, забрзана работа на срцето или неможност за мокрење), контактирајте со вашиот лекар.
Бремените жени, лицата над 60 години, децата или лицата со болести како што се болести на срцевите залистоци, дијабетес, бубрежна болест или ХИВ, или лицата кои се лекуваат од карцином, исто така, треба да побараат стручна помош.
Симптоми
Првите симптоми на труење со храна обично се појавуваат околу еден или два часа по јадењето на загадената храна. Меѓутоа, во некои случаи може да потрае неколку часа, па дури и неколку недели за да се појават првите симптоми.
Главните симптоми вклучуваат:
- Стомачни грчеви
- Губење на апетит
- Гадење
- Повраќање
- Дијареја (може да содржи крв или слуз)
- Недостаток на енергија
- Слабост
- Висока температура
- Болка во мускулите
- Треска
Ако се прашувате дали имате труење со храна, добро е да размислите што сте јаделе. Храната може да се контаминира ако не е правилно подготвена, ако не се чува во фрижидер по потреба, ако има истечен рок на употреба, ако ја допре некој што е болен или по вкрстено контаминирање со друга храна.
Дополнително, бидете особено внимателни кога користите даски за сечење, ножеви и други кујнски алатки кои дошле во контакт со сурово месо.
Храна која најчесто предизвикува труење:
- Сурово месо како говедско, свинско и месо од живина;
- Школки;
- Печурки;
- Јајца;
- Непастеризирано млеко;
- Готова храна како што се паштети, меки сирења и однапред подготвени сендвичи.
