Од последица на инфекција со коронавирус, почина 10-годишно момче. Со покачена тенпература, главоболка и болки во стомакот пред четири дена било примено на Клиниката за детски болести во Загреб. Состојбата му се влошила, итно било преместено на Клиниката за инфективни болести исто Загреб, но и покрај напорите, лекарите не успеале да му го спасат животот.
Момчето починало од мултисистемски инфламаторен синдром (MIS-C) – како последица на инфекција со коронавирус. Во Хрватска досега се евидентирани 20 случаеви, а од КОВИД-19 досега се заразени над 21.600 деца до 19 години.
Д-р Зоран Барушиќ, заменик директор на Клиниката за инфективни болести во Загреб, вели дека момчето починало од мултисистемски инфламаторен синдром, предизвикан од SARS-CoV-2. Тој вели дека текот на болеста бил тежок од самоиот почеток на прием на детето во болница.
“Овој синдром се јавува како последица по преболениот КОВИД-19 кај децата во временски интервал од неколку дена до неколку недели. Болеста може да биде со благ тек, но и исклучтелно тешка состојба“, нагласува д-р Барушиќ и додава дека симптомите се висока телесна температура, но и голема зафатеност на останатите органски системи.
Според него, заболените деца имаат промена на слузницата и кожата, болни и зголемени лимфни јазли, но и проблеми со дигестивниот тракт.
Според хрватските експерти, сите деца кои се соочуваат со овој синдром, веќе ја преболеле болеста КОВИД-19 и биле асимптоматски, со благи симптоми.
“Мултисистемскиот инфламаторен синдром се презентира со лоша општа состојба, шок и срцево затајување. Често се јавуваат гастроинтестинални симптоми, болки во стомакот, повраќање, пролив и неспецифичен осип на различни делови на телото. Може да е присутен и конјуктивитис“, вели доц. д-р Кристина Томулиќ.
Класични симптоми се болки во стомакот, повраќање, висока температура, осип, којнуктивитис. MIS-C може да предизвика затајување на сите органи. Неретко децата имаат осип со различен изглед. Засега е познато дека почнува нагло, со изразено висока температура. Во болниците при тестирањето, дел од децата не се веќе позитивни на КОВИД-19, но во крвта им се докажува дека имаат антитела на КОВИД-19 како проверен знак дека го прележале.
Во САД, Центарот за контрола и превенција на болести, пред две недели објави податоци за зачестеноста кај децата на овој синдром. Забележани се 1659 случаи на MIS-C, а 26 деца се починати, минатата година. Истражувањата покажале дека кон синдромот посклони се машките деца, но процентот е речиси ист кај двата пола.
Болеста се манифестира со зголемени воспалителни параметри во крвта, може да ги зафати сите органи, срцето, бубрезите, гастроинтестиналниот тракт, да предизвика невролошки проблеми, како и симптоми на воспаление на дишните патишта.
Досегашните истражувања покажуваат дека децата кои развиваат MIS-C во 70 отсто од случаевите имаат потреба од згрижување на одделите за интензивна нега. Кај 10 проценти од децата кои се опоравиле од овој синдром, останува оштетување на срцето кое треба да се следи и кое најверојатно ќе бара доживотно лекување.
