Многу родители ги запишуваат децата на разни спортски активности штом ќе наполнат три години, што начелно е добра одлука, но поради неразвиени коски и мускули, некои спортови може да бидат штетни за толку мали деца, предупредуваат германските доктори.
Спортските активности ги формираат мускулите, но и помагаат во координацијата на движење, во развојот на моторичките вештини и рамнотежата, потсетува Катја Шмит, професорка на Институтот за спортски науки при берлинскиот Универзитет Хумболд. Во исто време, кај децата се развиваат и социјалните вештини, што е особено важно во тимските спортови како ракомет, одбојка, фудбал…
„Истражувањата покажале дека преку спортот се поттикнува способноста на детето подобро да се концентрира на било која работа„, вели Шмит.
Кога се работи за сосема мали деца, оние до три години, на родителите им се советува внимателно да ги избираат спортските активности, вели кинезиологот Илина Герлин од германскиот Спортски факултет во Келн. Предупредува дека сите активности не се погодни за децата од предучилишна возраст, особено кога станува збор за деца до три години.
„На таа возраст, децата треба да се поттикнат на активности кои активираат природни движења на телото„, вели Герлин. „Ако прерано се започне со спортски активности кои бараат активирање на точно одредени мускулни групи, многу често може да дојде до оштетување на мускулите, но и на коските. Поради тоа е важно вежбите да не се тешки, но и времето во кое се активирани сите мускули да биде пократко„.
Таа истакнува дека за ова е најдобра детската гимнастика. Еден од спортовите кои позитивно влијае и на физичките и на психичките способности на детето и одлично ги воведува во спортскиот живот, а со неа може да почнат да се занимаваат уште од втората година од животот. Најдобар ефект за обликувањето на телото и физичкото здравје има пливањето, но со овој спорт може посериозно да се занимаваат дури по шестата година, иако некои стручњации сметаат дека децата веќе од пет години може да почнаат да тренираат пливање.
