Децата кои ќе се разболат од коронавирус ретко имаат долгорочни симптоми и повеќето се опоравуваат за помалку од една недела, покажуваат истражувањата.
Научниците од Кралскиот колеџ во Лондон велат дека иако мала група може да има продолжени симптоми на болеста, уверени се дека тој број е мал.
Студијата испитувала 1.734 деца, на возраст меѓу пет и 17 години, за кои било пријавено дека развиле симптоми и биле позитивни за Ковид-19 во периодот од септември 2020 година до февруари 2021 година
Експерт на Кралскиот колеџ за педијатрија и детско здравје рече дека податоците го одразуваат она што лекарите го виделе во клиниките. Во споредба со возрасните, децата се далеку помалку изложени на ризик од коронавирус, пишува Би-Би-Си.
Многу заразени не развиваат симптоми, а оние кои се јавуваат имаат тенденција да имаат блага болест.
Оваа рецензирана студија, објавена во часописот „Lancet Child and Adolescent Health“, се занимавала со тоа како Ковид-19 влијае на децата во однос на другите респираторни заболувања. Биле користени податоци кои ги дале родителите или старателите на британската апликација „Zoe Covid Study“.
Студијата испитувала 1.734 деца, на возраст меѓу пет и 17 години, за кои било пријавено дека развиле симптоми и биле позитивни за Ковид-19 во периодот од септември 2020 година до февруари 2021 година.
Истражувачите велат дека е многу тешко да се открие колку деца биле заразени во тој временски период, но тие проценуваат дека повеќе од 400.000 деца и млади луѓе биле позитивни на вирусот. Утврдено е дека четири проценти имале симптоми четири или повеќе недели, а два проценти имале симптоми повеќе од осум недели.
- Најчесто пријавувани симптоми биле главоболка и замор. Другите симптоми вклучувале болки во грлото и губење на чувството за мирис
Во просек, постарите деца обично биле болни малку подолго од децата во основно училиште, а на оние на возраст од 12 до 17 години им била потребна една недела да се опорават, додека кај помалите деца болеста траела пет дена.
Научниците се надеваат дека овие наоди ќе ги смират семејствата.
Тимот, исто така, испитал еднаков број деца кои имале симптоми, но биле негативни на Ковид-19. Само неколку деца, 15 од 1.734, имале симптоми најмалку 28 дена, помалку од едно на 100.
Ема Данкан, професор по клиничка ендокринологија на Кралскиот колеџ во Лондон, која работела на истражувањето, на прашањето дали децата можат да имаат долгорочни симптоми на болеста по прележување на Ковид-19, одговорила „дека е можно, но не е вообичаено“.
„Децата исто така може да имаат продолжени симптоми на други болести. Мораме да се грижиме за нашите деца кои имале долготрајни болести, без оглед дали станува збор за Ковид-19 или за што било друго“, рече Данкан.
