Помагањето на децата да се чувствуваат самоуверени вклучува повеќе од изговарање позитивни и мотивациони зборови. Должност на родителите е да им помогнат на децата да се чувствуваат способни, силни и независни во многу работи што ги прават, дури и на рана возраст.
Родителите можат да им помогнат на децата да развијат самодоверба на повеќе начини, а The Health Site дава осум многу корисни насоки како да го направат тоа.
Дајте им простор на децата
Свесни сме дека понекогаш е речиси невозможно да не се вмешаме во одлуките што ги носат децата и ситуациите во кои се наоѓаат. Но, за да може детето да изгради самодоверба, оставете го да ризикува и само да сфати што се случува. Со овој метод тие ќе научат многу повеќе и на крајот ќе станат психолошки посилни, што ќе им користи во иднина.
Пофалете ги и за мали достигнувања
Сите сакаме да слушаме дека некој нè пофалува за работата што сме ја направиле, а особено сакаме да знаеме дека нашите родители се горди на нас. Но, родителите треба да им честитаат на своите деца и за „малите“ достигнувања, не само за, на пример, добрите оценки. Фокусирајте се на нивните напори и на она што го постигнале, дури и ако мислите дека тоа не е толку голема работа. За децата, речиси сигурно е.
Оставете ги сами да носат одлуки
Дури и малите деца треба да имаат право да донесуваат одлуки што ги засегаат. Дајте им слобода во одлучувањето за одредени работи, на пример, што ќе облечат или кога и како ќе ја чистат собата. Како што растат, дозволете им да носат одлуки за себе се повеќе и повеќе. Со примена на овој метод децата се повеќе ќе се чувствуваат одговорни и самоуверени.
Нека учат од своите грешки
Донесувањето лоши одлуки е дел од растењето. Не ги карајте децата премногу ако понекогаш не прават нешто како што треба. Се разбира, тоа зависи од тоа што направиле. Но, генерално, децата најмногу ќе научат дека згрешиле ако самите тоа го сфатат. Тие моменти ги учат на важни лекции и како да не ги повторат.
Замолете ги да ви помогнат
Ако правите ручек, правите колачиња или поправате нешто во гаражата, замолете ги вашите деца да ви помогнат со едноставни задачи. Ова ќе ги поттикне да се вклучат во домашните работи, ќе се чувствуваат корисно, а патем ќе научат како да бидат одговорни. Попатно ќе поминете квалитетно време со вашето дете кое можете да го искористите за разговор.
Бидете нивни водич низ предизвиците
Кога вашите деца ќе се сретнат со предизвици во животот, а сигурно ќе се сретнат, не се обидувајте да ги решавате нивните проблеми наместо нив. Во такви ситуации, послужете како личност која ќе ги советува како да го решат проблемот, давајќи им можност на крајот да донесат своја одлука. Ќе се вклучите како родител во животот и проблемите на вашето дете, но и ќе го научите сам да го реши проблемот.
Поттикнете нивен интерес за хоби
Децата може да имаат различни интереси, поддржете го она што сакаат да го прават и поттикнете ги да завршат што и да започнат. Ако почнат да бојат некој цртеж, поттикнете ги да го завршат, а потоа наградете ги така што ќе го закачите на фрижидерот за сите да го видат.
Пофалете го нивниот труд
Кога им давате комплименти на децата, бидете јасни на што мислите. Разговарајте за тоа колку напорно работеле или за напредокот што го постигнале. Немојте само да ги пофалувате без да им дадете до знаење за што зборувате. На овој начин и тие ќе се чувствуваат подобро за она што го направиле и ќе се трудат да бидат уште подобри.
