Шарлахот или скарлатина е акутна, заразна болест предизвикана од бета хемолитички стрептококи од групата А. Оваа бактерија може да предизвика разни инфекции и воспаленија (грло, синуси, уво,кожа, бели дробови, срце). Како ќе се манифестира болеста зависи од возраста на детето.
Инфекцијата од оваа бактерија се пренесува од болен човек, по капков пат или контакт со инфицирана кожа. Воспаленијата се почести во зима, а најбрзо се пренесуваат во затворен простор каде има многу луѓе (градинки, училишта, интернати).
Инфекција со стрептококи која се манифестира како ШАРЛАХ најчеста е од 3 до 12 години, многу ретко пред третата година од животот.
Болеста може да се прележи повеќе пати (кај 5 до 10 проценти од децата), а причината е што имунитетот е само делумен и тоа што клиничкиот тек се менува при антибиотската терапија, така да стекнатиот имунитет е послаб.
Инкубацијата, односно времето од почетокот на инфекцијата до појавата на првите симптоми, е од 1 до 5 дена, обично 3 дена. Обично се јавува покачена температура и до 39 степени, главоболка, може и повраќање, болки во грлото, стомакот. После 1 до 2 дена се јавува и осип, што е главна карактеристика на шарлахот.
При преглед на грлото на болното дете се воочува оток, силно црвенило на ждрелото, крајниците, каде може да се видат и бели наслаги.
По мекото непце и ресицата може да се видат ситни точки ( петехии). При оваа болест јазикот е карактеристичен, во почетокот прекриен со бели наслаги и личи на бела јагода, а покасно нема веќе бели наслаги, туку се истакнува папилата која отскокнува и дава изглед на „малина” јазик.
Осипот е исто така карактеристичен и густ, налик на сомот. Кога ке се помине со рака преку осипот, тој се губи. Тој брзо се шири по целото тело, а најизразен е на прстите, пазувите, на долниот дел на стомакот и на внатрешната страна на натколениците. Челото и образите се црвени, а околу усните се јавува бледило. На вратот може да се почувствуваат зголемени лимфни жлезди.
По 3 до 5 дена осипот избледува, а кожата почнува благо да се перута, чеша, а тоа може да трае подолго време. Дланките и табаните се лупат во поголеми парчиња.
Лекарот врз основа на клиничката слика може да се посомнева во оваа болест, меѓутоа правата потврда на болеста може да се утврди со наод на бактерија од брис од грлото. Меѓутоа, понекогаш и тоа не е доволно за дијагноза, па може да се направи и крвна слика за специфични антитела.
