Грицкањето нокти е лоша навика која исто така го зголемува ризикот од инфекции, бидејќи децата лесно можат да пренесат бактерии и вируси од валканите раце преку устата во своето тело. Исто така, онихофагијата, како што стручно се нарекува грицкањето нокти, го зголемува и ризикот од заболување на ноктите, бидејќи може да доведе до гнојни воспаленија на кутикулите и слично.
Велат дека децата грицкаат нокти кога се чувствуваат несигурни, кога се љубоморни или им е непријатно и дека тоа е едноставно начин да ги контролираат непријатните емоции што ги чувствуваат.
Самиот почеток на грицкање нокти најчесто се случува во стресна ситуација (почнување на училиште, раѓање на помал брат или сестра, раздвојување од мама и тато…), додека постарите деца, тинејџерите, често ги грицкаат ноктите за да се смират и да ги ублажат негативните чувства како страв, анксиозност…
Што да направите ако детето ги гризе ноктите
Она што никогаш не треба да го правите на почетокот е да го карате вашето дете, бидејќи грицкањето нокти за него е нешто како условен рефлекс, тие се чувствуваат како да не можат да се справат со своите емоции и ситуацијата на некој друг, порационален начин.
Немојте да го манипулирате или уценувате детето, бидејќи тоа може да има сосема спротивен резултат од она што би сакале да го постигнете. Покрај тоа, вашето дете може да продолжи да ги гризе ноктите, но тоа да го крие од вас. Наместо тоа, обидете се да утврдите што го вознемирува детето и потрудете се да го смирите. Доколку е потребно и се чувствувате дека не можете сами да се справите со тоа, побарајте стручна помош.
Набљудувајте го вашето дете и обидете се да разберете кога најчесто ги грицка ноктите, во кои ситуации, кои се неговите стравови или што го мачи.
Обидете се да го смирите детето. Повремено прашувајте го како се чувствува и објаснете му дека негативните, непријатни емоции не се нешто од што треба да се плаши, дека се дел од човечката природа, од животот.
Помогнете му на вашето дете да се ослободи од анксиозноста, нервозата и стравовите нудејќи му алтернативни активности – спорт, некои креативни работилници, слушање музика, читање…
Секогаш бидете тука за да го поддржите вашето дете, постојано кажувајте му дека го сакате, за да се чувствува мирно и безбедно, а тоа ќе му помогне да се ослободи од оваа лоша навика.
