Холивудскиот актер Ештон Качер во видеото за претстојната епизода на каналот National Geographic – „Running Wild with Bear Grylls: The Challenge“ што го објави Access Hollywood изјави дека има ретка форма на васкулитис што влијаела на неговиот вид и слух и му ја нарушила рамнотежата.
Васкулитис се јавува кога имунолошкиот систем на телото ги напаѓа вените, артериите и малите капилари
„Ми требаше една година да го повратам сето тоа“, рече Качер, додавајќи дека не го цениме нашето здравје се додека не ни се случи такво нешто, се додека не дојдете во ситуација да се запрашате дали повторно ќе можете да гледате, слушате и одите.
„Среќен сум што сум жив“, изјави актерот.
Компликациите предизвикани од васкулитис го одзедоа животот на актерот и режисер Харолд Рамис во 2014 година, изјавија агентите на Рамис. Рамис, кој ги режираше „Caddishack“, „National Lampoon’s Vacation“ и „Groundhog Day“ и глумеше во „Ghostbusters“ и „Stripes“, почина на 69-годишна возраст, четири години откако се разболе, пренесува CNN.
Симптоми на васкулитис
Васкулитис се јавува кога имунолошкиот систем на телото ги напаѓа вените, артериите и малите капилари.
Воспалението ги стеснува тие крвни садови и го ограничува, па дури и го запира протокот на крв, што може да предизвика оштетување на органите или формирање на аневризма, според Националниот институт за здравје (НИХ).
Ако аневризмата пукне, може да предизвика внатрешно крвавење кое може да биде фатално.
- Во зависност од специфичниот тип и сериозност на состојбата и кои органи се зафатени, симптомите на васкулитис варираат и можат да бидат благи, умерени или опасни по живот
Вообичаени симптоми вклучуваат губење на апетит, губење на тежината, замор, осип, болки и треска.
Возраста, етничката припадност, семејната историја и факторите на начинот на живот како што се пушењето и употребата на недозволени дроги, може да придонесат за ризикот од васкулитис. Исто така може да придонесат и одредени лекови за висок крвен притисок, болести на тироидната жлезда и инфекции, забележува НИХ.
Васкулитисот може да се појави сам или во комбинација со други ревматски заболувања, како што се ревматоиден артритис, лупус или склеродермија. Инфекцијата со хепатитис Б или Ц исто така може да биде предизвикувач, како и ракот на крвта како што се леукемија и лимфом.
Третман
Третманот е насочен кон намалување на воспалението. За благи случаи, лекови против болки без рецепт може да помогнат. За потешки случаи, лекарите може да препишат стероиди, моноклонални антитела и имуномодулатори или имуносупресивни лекови.
