Шумот на срце е медицински термин кој укажува на присуство на звуци при минување на крвта низ крвните садови на срцето. Шумот на срце се открива многу често кај децата, но најчесто е сосема безопасен. Сепак, родителите се плашат дека нивното дете има болно срце, односно некоја срцева мана.
Шумот првично се открива при слушање со стетоскоп. Шумењето појасно се слуша кај послабите деца. Причина за загриженост кај родителите навистина нема, бидејќи ако шумот на срце е резултат на некоја вродена срцева мана кај детето, таа ќе биде откриена многу брзо по раѓањето на детето. Доколку докторот сепак се посомнева дека се работи за посериозен шум, особено ако е придружен со болки во градите, отежнато дишење или чести инфекции на белите дробови, сигурно ќе го упати детето на ултразвук.
За среќа, шумот на срце не претставува болест кај детето. Лекарите велат дека повеќе од 50 проценти од здравите деца имаат срцев шум. Бидејќи овој тип на шум се сретнува кај здраво срце, тој се нарекува функционален или физиолошки шум. Во народот е познат и како шум на здраво срце. Најчесто се открива при инфекција која е придружена со покачена температура.
Шумот на срце во повеќето случаи не бара лекување, освен што е неопходно да се едуцираат родителите доколку е потребно да се променат некои навики во животот на детето. Децата со шум на срцето можат нормално да се занимаваат со спорт
Шумот на срце се појавува многу често, особено кај деца помали од 3 години, кај повеќе од 80 % од прегледаните деца. Кај бебињата, вродени срцеви мани се откриваат само кај 0,7 отсто од децата, додека во училишна доба срцеви мани се јавуваат кај 0,38 отсто од прегледаните деца.
Примери за срцеви мани:
- отвори во внатрешниот ѕид на срцето,
- стеснување на главниот срцев залисток,
- стеснување на главната аорта,
- блокиран премин помеѓу срцето и белите дробови,
- други аномалии.
Како се третира шум на срцето и срцеви мани?
Шумот на срце во повеќето случаи не бара лекување, освен што е неопходно да се едуцираат родителите доколку е потребно да се променат некои навики во животот на детето. Децата со шум на срцето можат нормално да се занимаваат со спорт. Доколку повремено се појавуваат тегоби, а детето се занимава и со физичка активност, во консултација со специјалист се препорачуваат многу ниски дози на пропранолол, кој е бета-блокатор и го намалува срцевиот ритам и јачината на срцеви контракции. Потребата од оперативен зафат е многу ретка.
Вродените срцеви мани, сепак, бараат навремена реакција. Во случај на сериозни срцеви заболувања, можеби ќе биде неопходна и операција, но повеќето деца по операцијата живеат потполно нормално и без никакви проблеми. Кај некои деца ретко се јавува потреба за повторна операција на подоцнежна возраст.
