Иако сончањето за време на бременоста е поврзано со бројни придобивки, прекумерното изложување на сонце може да има долгорочни последици и за мајката и за нероденото дете. Имено, лекарите предупредуваат дека претераното сончање носи ризик од рано стареење на кожата и појава на малигнен рак на кожата, односно меланом. Ситуацијата е уште поопасна кога жената е бремена бидејќи сето тоа може да има несакани последици по здравјето на плодот.
Трудниците треба да водат сметка за тоа дека предолгото изложување на сонце може да ја подигне температурата на телото на жената, што доведува до зголемување на температурата на бебето.
Лекарите предупредуваат дека тоа може да предизвика оштетување на мозокот. Освен тоа, долгото сончање на плажа го зголемува ризикот од дехидрација, што е особено опасно за трудниците, но и за бебињата.
Можни се и несакани промени на кожата. За време на бременоста, естрогенот во нашето тело може да го зголеми ризикот од хлоазма, односно зголемена пигментација на кожата кога сме прекумерно изложени на сонце и неговите ултравиолетови зраци, а овие промени можат да останат на кожата дури и по бременоста.
