Храната што вашето дете ја јаде во првите две години од животот (и хранливите состојки што ги прима во текот на гестацијата) имаат силен ефект на неговото здравје и развој. Според Академијата за педијатрија на САД, постојат одредени хранливи материи кои се особено критични – а нивниот недостаток може да има доживотни последици. Овие хранливи материи вклучуваат железо, цинк, бакар, холин и витамин Д.
Исхраната во најраната возраст не само што може да влијае на ризиците од развој на прекумерна телесна тежина, висок крвен притисок и дијабетес во детството и возрасната доба, туку првите две години се најважниот период за развој на мозокот, вклучувајќи ги подрачјата што ги контролираат помнењето, обработката, планирањето, и вниманието. Според Академијата, недоволниот внес на клучните хранливи материи може да доведе до дефицит во функцијата на мозокот што не може да се врати. Всушност, несоодветната исхрана во првите две години е поврзана со понизок коефициент на интелигенција, проблеми во однесувањето и понзок успех во училиште.
“Истражувањата на оваа област стануваат важни“, вели д-р Сара Џејн Шварценберг, професорка по педијатрија на Универзитетот во Минесота и авторка на научниот труд “Навистина можеме да го подобриме здравјето на децата со долгорочно обрнување внимание на исхраната“.
Овие хранливи материи се особено важни за ран развој на мозокот. Еве во кои намирници ги има:
- Протеини: месо, живина, риба, јајца, јогурт, грав, житарки
- Цинк: говедско, свинско, млеко, тофу, грав, путер од кикирики
- Бакар: интегрални житарки, грав, компири
- Железо: говедско месо, пилешко, риба, спанаќ, грав
- Селен: пилешко, јајца, кафеав ориз
- Холин: говедско месо, живина, јајца, бела риба, лосос, грав
- Фолна киселина: спанаќ, сок од портокал, ориз, авокадо, леб од интегрални житарки
- Витамин А: сладок компир, морков, манго, јајца, млеко
- Витамин Д: лосос, туна, млеко, сок
- Витамин К: спанаќ, кељ, брокула, грашок, боровинки
- Витамин Б6: житарки, наут (леблебија), банана, компир, путер од кикирики
- Витамин Б12: житарки, лосос, млеко, говедско месо, јогурт, сирење
- Полинезаситени масни киселини: риба, масло од репка, ленено семе, сончогледово масло.
Запомнете дека млекото или „немлечното“ млеко не се препорачуваат како примарни напивки за деца под една година. Држете се до мајчиното млеко или формула, иако другите млечни производи како јогуртот и сирењето се во ред. Исто така е во ред да користите малку млеко за готвење или печење.
