Научниците утврдиле дека бебињата кои лазат инхалираат четири пати повеќе прашина отколку возрасните луѓе. Без оглед на тоа колку се трудите да го одржувате домот чист, подовите и теписите задржуваат голема количина на прашина и биолошки честички на кои бебињата кои лазат се постојано изложени. Сепак, истражување спроведено во Детскиот центар Џон Хопкинс покажало дека таа изложеност е добра за бебето бидејќи колку порано се ставаат во контакт со алергени, поверојатно е дека ќе изградат подобар имунитет.
Бебињата вдишуваат различни биолошки честички
За истражување објавено во списанието Environmental Science and Technology, истражувачите креирале роботско бебе кое се движело на различни примероци од теписи земени од вистински семејства.
Нивната цел била да проучат како движењата на бебињата додека лазат ги мешаат и ги креваат микробите и прашината од тепихот и како изгледа процесот на вдишување. Тие заклучиле дека облакот од прашина што би се дигнал околу бебето има 20 пати повисоки нивоа на прашина отколку во останатите делови од собата.
Овие честички се состоеле од клетки на кожа, бактерии, полен и габични спори. Ова е прво истражување кое покажало дека бебињата кои лазат се изложени на толкава количина биолошки честички, од кои повеќето завршуваат во нивниот респираторен систем бидејќи нивните дишни органи се блиску до подот.
Стерилниот дом не е добар за нашиот имунитет
Претходни истражувања покажале дека раното изложување и вдишување на микроби, бактерии, габи и растителни и животински алергени е клучно за развојот, но и за заштита од астма и алергии, во еднаква мерка.
Бебињата изложени на поголеми количества нечистотија и различни микроби имаат помали шанси за развој на астма подоцна во животот, што ја потврдува честата теза дека не треба да живееме во стерилни услови бидејќи така не дозволуваме имуниот систем да се развива и зајакнува.
