Адријана Лима минатата година го роди синот Сајан Лиам Лемерс. По породувањето нејзиниот Инстаграм профил го преплавија коментари за нејзиниот изглед.
„Направила нешто на лицето. Ботокс, филери, не е иста“, напишала една личност.
„Што направи со твоето прекрасно лице?“, ја прашала друга жена.
42-годишната манекенка која има три деца, на критиките одговори. Таа изјави: „Ова е лице на уморна мајка на тинејџерка, две деца предпубертет, едно активно едногодишно дете и три кучиња. Ви благодарам на грижата“.
Лима не е првата мајка чиј изглед се променил по породувањето. Физичките промени за време на бременоста и по породувањето се вообичаени за сите жени. Повеќето промени се привремени, но некои остануваат трајни.
Промени на кожата
За време на бременоста на кожата може да се појават темни дамки наречени мелазма. Бенките и пегите исто така можат да потемнат. Ова се случува поради зголемување на пигментот меланин кој ја дава боја на косата и кожата. Темните дамки често избледуваат по породувањето, но некои жени со мелазма може да се борат со години.
Меланинот е одговорен и за појавата на темна линија која се протега низ стомакот за време на бременоста. Се нарекува линија нигра.
Губење на косата
Жените обично не губат коса за време на бременоста, напротив, забележуваат дека е густа и посјајна, пишува International Journal of Dermatology.
Но, по породувањето, хормоните се враќаат во нормала, што предизвикува опаѓање на косата. Во повеќето случаи, овој симптом се стабилизира во рок од една година.
Проширени вени
Отечените, болни и сини проширени вени се резултат на дополнителниот притисок што детето во развој го врши врз крвните садови на мајката, особено на долните екстремитети. Најчесто се појавуваат на нозете, вулвата или ректумот и предизвикуваат хемороиди.
За да се спречи развојот на овие проблеми, Американскиот колеџ за акушери и гинеколози (ACOG) ги советува жените да носат компресивни чорапи, да избегнуваат да седат со прекрстени нозе долго време, да ги креваат нозете секогаш кога е можно за да го намалат ризикот од хемороиди,а да останат хидрирани и да внесуваат доволно растителни влакна.
Во секој случај, проширените вени и хемороидите често исчезнуваат неколку месеци по породувањето.
Стрии
Стриите се универзални, за мажи и жени, и се појавуваат во форма на розови, црвени, виолетови или светли линии на кожата. Иако обично остануваат трајно на телото, со текот на времето можат да осветлат.
Експертите од Johns Hopkins Medicine сугерираат дека ретиноидните креми, добиени од витаминот А, можат да ја намалат појавата на нови стрии. Ретинолот, сепак, треба да почне да се користи што е можно поскоро. Ако стриите избледат до бело, за ретинолот е предоцна да биде ефикасен.
Промена на големината на градите
Градите обично растат за време и по бременоста, а откако жената ќе престане да дои, тие се намалуваат. Покрај тоа, градите ја губат својата еластичност по бременоста и почнуваат да спуштаат.
Добрата вест е дека доењето може да резултира со помал ризик од развој на рак на дојка. Според анализа од 2002 година објавена во списанието The Lancet, за секоја година која жена дои, нејзиниот ризик од рак на дојка опаѓа за околу 4%.
Промени во лицето
Сјајот во бременост е резултат на зголемениот проток на крв и производство на себум. Но, зголемувањето на производството на себум може да предизвика појава на акни.
Други промени на лицето се отечен изглед, кој е резултат на задржување на течности, а може да се појави и во нозете и стапалата. Задржувањето на течности исто така може да ја намали дефиницијата на јаболчниците на трудницата.
Кај некои жени, носот изгледа поголем или малку отечен. Ова е резултат на зголемена циркулација на крвта во слузницата, вклучувајќи ги и мембраните во носот и синусите.
Промени во стапалата
Една работа што не исчезнува по бременоста е растот на стапалата, што е резултат на дополнителната тежина што се јавува за време на бременоста и хормонот релаксин.
Релаксинот, како што сугерира неговото име, им овозможува на коските, лигаментите и другите ткива да се опуштат и да се истегнат за време на породувањето. Но, релаксинот влијае на сите ткива во телото, вклучувајќи ги и стапалата, кои се растегнуваат и сплеснуваат за време на бременоста.
