Нова студија на Националниот институт за здравје на САД открила зошто децата обично се поштедени од тешки симптоми на Ковид-19. Како дел од студијата, научниците го набљудувале одговорот на антителата на група доенчиња кои биле заразени со коронавирус. Тие откриле дека имунолошкиот одговор на доенчињата се наоѓа во носот, а не во крвта како кај возрасните. Тие сметаат дека ова е објаснувањето зошто децата имаат поблаги реакции на болеста.
Вирусот обично влегува во телото преку носот или устата. Ако вирусот влезе преку носот, децата можат да се одбранат од „болеста штом ќе влезе во нивното тело, пред да се прошири низ остатокот од организмот“, објаснуваат тие.
Во истражувањето учествувале повеќе од 80 бебиња и мали деца.
„54 деца беа заразени и имаа благи симптоми, додека 27 од нив кои имаа негативен тест служеа како контролна група. Во моментот на зараза, децата биле на возраст од еден месец до четири години, а половината имаа девет месеци или помалку“, се наведува во студијата.
Струката се залага за вакцинирање на децата
Студијата открила и дека доенчињата и малите деца произведуваат одговор на антитела што трае подолго отколку кај возрасните. Нивните нивоа на антитела се зголемиле и останале високи до 300 дена, додека возрасните произведуваат антитела кои првично се зголемуваат, а потоа се намалуваат по неколку недели. Дополнително, децата имаат повеќе одговори на назалните антитела од возрасните, а возрасните имаат повеќе воспалителни цитокини од децата. Цитокините се протеини кои се поврзани со тешките случаи и симптомите.
Без оглед на овие резултати, научниците остануваат согласни за вакцинирање на децата против Ковид-19 и ги охрабруваат родителите да ги вакцинираат своите деца против оваа болест.
