Шеќерот може да помогне во ублажување на болката кај бебињата за време на болничките процедури, открива нов научен преглед. Бебињата, особено новороденчињата и доенчињата во единиците за интензивна нега, рутински се подложени на повеќе процедури, вклучувајќи вакцинација и тестови на крвта. Бидејќи нивните системи за регулација на болката се сè уште незрели, доенчињата ја доживуваат болката поинаку од возрасните, честопати поинтензивно.
Новиот Cochrane преглед открива дека сахарозата може да ја намали болката за време и веднаш по инјектирањето со игла. Авторите исто така откриле дека сахарозата се покажала поефикасна од цуцлите.
„Родителите можеби ќе бидат изненадени кога ќе дознаат дека нешто едноставно како што се неколку капки шеќерен раствор може да направи вистинска разлика за удобноста на нивното бебе за време на тестовите на крвта,“ рече Лигјана Кандидо, коавтор на студијата од Универзитетот во Отава во Канада.
Авторите анализирале 29 испитувања кои вклучиле 2764 бебиња ширум светот. Во сите нив, доенчињата биле по случаен избор распоредени во две или повеќе групи: шеќер и други методи за ублажување на болката, како што се цуцли, доење и контакт кожа на кожа. Тие откриле дека новороденчињата на кои им бил даден шеќер имале помала болка за време и кратко по процедурата, во споредба со оние кои не добиле ништо или добиле вода.
Научните докази за неговата ефикасност во споредба со доењето и негата со контакт кожа на кожа се сè уште ограничени, забележаа авторите.
Особено корисно за хоспитализирани бебиња
Некои новороденчиња поминуваат време во болница, без разлика дали затоа што се родени предвреме или затоа што треба да примат третман за одредена состојба. Во овој период, тие често се изложени на игли за тестови на крвта или за вметнување на интравенски линии за администрирање течности и лекови.
Прегледот истакна дека е широко прифатено оти повторливата и нетретирана болка во раните фази од животот негативно влијае на растот и развојот.
Новиот Cochrane преглед открива дека сахарозата може да ја намали болката за време и веднаш по инјектирањето со игла
„Новороденчињата се подложени на чести процедури со игла во болница без никакви мерки за ублажување на болката или утеха, иако на постарите деца и возрасните ретко им се прават овие процедури без грижа за болката,“ рече водечкиот автор Маријана Буено од Универзитетот во Торонто.
Таа додаде дека оваа евтина интервенција докажано делува во рок од неколку минути и може да биде особено корисна кога други методи за утеха не се достапни. Авторите забележаа дека долгорочните ефекти од континуираната употреба на сахароза треба дополнително да се проценат.
„Пораката од нашите наоди е дека, во крајна линија, на доенчињата им е потребно и треба да примат третман за справување со болката пред процедура како што е венепункција (земање крв од вена)“, додаде Буено, пренесува Euro News.
