Една судска одлука предизвика гнев на јавноста, сите се шокирани што на мајка која дои и било речено дека мора да го храни своето дете со шише. Всушност, поради спогодба за заедничко старателство со нејзиниот поранешен сопруг, судот во Вирџинија и наредил на Арлета Рамирез да ја навикне ќерката на шише, бидејќи нејзиниот татко ја посетува четири дена во неделата.
“Мајката е должна да вложи максимални напори детето да има распоред на хранење и користење на шише“, стои во одлуката која исто така му дозволува на таткото Мајк, да го посетува детето.
Поради ова Рамирез се обидела да ја одвикне ќерка си од мајчиното млеко. Мајката за медиумите изјавила дека се обидела да го измолзува млекото, но тоа го намалило производството бидејќи детето повеќе не цицало. Нејзиното бебе, кое јаде на секој час, исто така на почетокот го одбивало шишето. Мајката е многу загрижена и згрозена од одлуката на судот, кој ја принудува буквално да престане да дои.
“Зарем тоа не е мое право? Зарем тоа не е во најдобар интерес на моето дете? Доказите и експертите укажуваат дека доењето е најдобро”, вели вознемирената мајка.
Таткото барал мајката да се измолзува, за да може да ја храни ќерката додека е со него, а мајката едноставно не може да го направи тоа бидејќи има се помалку млеко. За случајот да биде уште побизарен, правниот застапник на таткото тврди дека “мајката на детето го користи доењето како оружје за да избегне таткото да го посетува детето“.
