Светската недела на доење се одбележува од 1 до 7 август во повеќе од 170 земји, а годинава под посебни околности во знак на глобалната пандемија COVID-19. Според препораките на СЗО фокусот оваа година е ставен на важноста на соработката, заедништвото и партнерските односи во промоцијата на доењето и пружањето поддршка на младите мајки.
Слоганот на годинешната Светска недела на доење е „Поддржете го доењето за поздрава планета“. Покрај придобивките за здравјето на детето, доењето, исто така, има позитивни ефекти и врз здравјето на мајката и придонесува за помала зачестеност на карцином на дојка и јајници, дијабетес и висок крвен притисок.
Мајчиното млеко е најдобрата храна за бебето кое има потреба од многу енергија, хранливи материи, минерали, витамини, масти и други материи, неопходни за интензивен раст и развој. Многу студии велат дека доените деца како возрасни се поздрави, поотпорни, позадоволни, подолговечни. Клучот за долгорочно здравје на човекот е токму во храната што ја внесува, а тоа е особено битно во почетокот на животот кога органскиот систем и имунитетот почнуваат да се развиваат и им се потребни специфични хранливи материи, кои ги има во мајчиното млеко.
Ексклузивно доење значи исхрана само со мајчино млеко во првите 6 месеци, без додавање на друга храна или течности. Мајчиното млеко овозможува заштита на децата од инфекции и болести, како и од појава на алергии
Интересни факти за мајчиното млеко кои можеби не сте ги знаеле е дека составот на млекото се менува како што расте бебето, како и тоа дека мајчиното млеко е уникатно – како отпечаток од прст, нема два исти примерока.
Светската недела на доењето се одбележува со цел да се охрабрат мајките да дојат и со тоа да се подобри здравјето на децата. Доењето не остава никакви последици врз животната средина, а мајчиното млеко е секогаш достапно и здраво.
УНИЦЕФ & СЗО: ПОРАКА ПО ПОВОД СВЕТСКАТА НЕДЕЛА НА ДОЕЊЕ 2020
ЗАЕДНИЧКА ПОРАКА на извршниот директор на УНИЦЕФ, Хенриета Х. Форд и генералниот директор на СЗО, Тедрос Аданом Гебрејесус
Темата на Светската недела на доење 2020 е „Поддржете го доењето за поздрава планета“. Во согласност со оваа тема, СЗО и УНИЦЕФ ги повикуваат владите да го заштитат и промовираат пристапот на жените до стручно советување за доење, клучна компонента на поддршката за доење.
Доењето му дава на секое дете најдобар можен почеток во животот. Има здравствени, нутритивни и емоционални придобивки и за децата и за мајките. И е дел од одржливиот систем на исхрана. Но, иако доењето е природен процес, не е секогаш лесно. На мајките им е потребна поддршка – и да почнат и да го одржат доењето.
Стручните услуги за советување може да осигураат дека мајките и семејствата ја добиваат оваа поддршка, заедно со информациите, советите и уверувањето што им е потребно за да ги хранат своите бебиња оптимално. Подобрувањето на пристапот до стручно советување за доење може да го продолжи времетраењето на доењето и да го промовира ексклузивното доење, со придобивки за бебињата, семејствата и економиите. Навистина, анализите покажуваат дека зголемувањето на стапките на ексклузивно доење може да спаси животи на 820.000 деца секоја година, генерирајќи 302 билиони долари дополнителни приходи.
„Преку посветеност, усогласено дејствување и соработка, може да обезбедиме секоја мајка да има пристап до стручно советување за доење, давајќи и моќ да му даде на своето бебе најдобар можен почеток во животот“
Стручното советување за доење може да биде обезбедено од различни лица, вклучително здравствени работници, советници за доење… За време на пандемијата COVID-19, уште поважно е да се пронајдат иновативни решенија за да се осигура дека пристапот до овие основни услуги не е нарушен и дека семејствата продолжуваат да го добиваат советувањето за доење коешто им е потребно.
Ова е причината зошто УНИЦЕФ и СЗО, ги повикуваат владите да ИНВЕСТИРААТ за да го направат стручното советување за доење достапно за секоја жена; ОБУКИ на здравствените работници, вклучително и акушерки и медицински сестри, за да даваат стручни совети за доење на мајки и семејства; ДА СЕ ОСИГУРААТ дека советувањето е достапно како дел од рутинските здравствени и нутритивни услуги кои се лесно достапни; ПАРТНЕРСТВО И СОРАБОТКА со здруженија на граѓани и асоцијации на здравствени работници; ЗАШТИТА на здравствените работници од влијанието на индустријата за храна за бебиња.
Заедно, преку посветеност, усогласено дејствување и соработка, може да обезбедиме секоја мајка да има пристап до стручно советување за доење, давајќи и моќ да му даде на своето бебе најдобар можен почеток во животот, се вели во заедничката изјава на УНИЦЕФ и СЗО по повод Светската недела на доење 2020.
Мајчиното млеко ги штити децата од инфекции и болести, како и од појава на алергии
Ексклузивно доење значи исхрана само со мајчино млеко во првите 6 месеци, без додавање на друга храна или течности. Мајчиното млеко овозможува заштита на децата од инфекции и болести, како и од појава на алергии. Исто така, доените деца многу побрзо закрепнуваат во случај на болест. Мајката која дои го намалува сопствениот ризик од настанување на одредени хронични болести, како на пример, рак на дојка, депресија поврзана со породувањето и др. Да потсетиме: доењето ви помага да остварите поблизок емоционален однос со вашето дете.
За разлика од мајчиното млеко, вештачкото млеко НЕ ги содржи состојките што помагаат вашето дете да се заштити од инфекции, болести или алергии. Вештачкото млеко се користи по препорака на избран лекар (педијатар).
ПОЛОЖБА НА МАЈКАТА И ДЕТЕТО ЗА ВРЕМЕ НА ДОЕЊЕ
Положбата на мајката треба да биде УДОБНА, може да е легната или седната, во зависност од нејзината здравствена состојба;
Положбата на детето треба да обезбеди добар контакт со градата на мајката;
ПРАВИЛЕН КОНТАКТ СО ГРАДАТА
Со правилниот контакт се овозможува успешно и ефикасно цицање, се избегнува голтање воздух, а истовремено се избегнува болка и оштетување на брадавиците на мајката.
ФРЕКВЕНЦИЈА НА ДОЕЊЕТО
Новороденото дете се дои толку често и толку долго колку што сака самото. Тоа овозможува создавање доволно млеко во градите на мајката и тоа според индивидуалните потреби на секое дете.
Индиректни знаци за успешно доење
Доењето е динамичен процес кој се менува со тек на време. Постојат неколку знаци кои можете да ги препознаете, а ви помагаат да се убедите дека доењето е успешно:
- Во првите недели по породувањето бебињата бараат да цицаат 8-12 пати во текот на 24 часа;
- Почнувајќи од четвртиот ден по породувањето, бебињата имаат 5-6 добро натопени со урина пелени во текот на 24 часа;
- Од четвртиот ден па приближно до 6 недели по породувањето, имаат најмалку 3-4 светло жолти столици во тек на 24 часа. Покасно се намалува нивниот број;
- Брадавките и градите не ве болат додека го доите детето;
- Цицањето на детето може да го осетите со ритам од 1 повлекување во секунда;
- Голтањето на детето е гласно и вие може да го слушнете;
- Вашето дете цица од едната града се додека само не ја отпушти брадавката. После мал одмор можете да му ја понудите и другата града;
- Вашите гради се меки по завршување на подојот;
- Вашето дете изгледа задоволно по завршување на подојот;
- Во текот на следните 1- 2 недели вашето дете ја враќа родилната тежина која ја изгубило по породувањето.
Извор: УНИЦЕФ: Водич за родители за здравје, раст и развој на детето (0 – 3 години)
