Студиите покажуваат дека лицата кои се позитивни на новиот коронавирус, се најзаразни во моментот кога прв пат ќе почнат лошо да се чувствуваат, објавија вчера стручњаците на Светската здравствена организација.
Според ова, токму поради тоа што луѓето се најзаразни токму пред првите симптоми, тешко е да се контролира вирусот кој предизвикува КОВИД-19, но можно е да се спречи ширењето со поригорозно тестирање и физичка оддалеченост, потенцираат експертите на СЗО.
“Се чини дека од многу ограничените информации кои сега ги имаме, луѓето имаат најголема количина на вирусот во телото, пред избивање на симптомите или кога ќе почнат да ги развиваат“, изјави Марија ван Керхов, епидемиолог во СЗО.
Прелиминарните студии спроведени во Германија и во САД покажуваат дека лицата со благи симптоми може да бидат заразни 9-8 дена, додека оние со потешки симптоми и многу подолго, додаваат таа.
Некои стручњаци ја доведоа во прашање нејзината изјава во понеделникот дека луѓето кои немаат симптоми на коронавирусот “многу ретко“ можат да заразат други лица, изјавувајќи дека таквите насоки би можеле да бидат проблематични.
Ван Керхов вчера појасни дека некои луѓе не развиваат симптоми, но сепак можат да заразат други.
“Некои модели говорат дека околу 40 проценти од преносот може да биде кај асимптоматските случаи, но тоа се модели на проценка. Затоа, тоа ане го вклучив во својот одоговор во понеделникот, па сега сакам да бидам јасна“, додаде таа.
Таа во понеделникот изјави дека луѓето кои на тестовите се покажуваат позитивни, а немаат симптоми, главно не ја пренесуваат инфекцијата.
Мајк Рајан, главен стручњак на СЗО за итни случаи, изјави дека новиот корнавирус се наоѓа во горните респираторни патишта, поради што многу полесно и се пренесува во споредба со САРС или МЕРС, кои се наоѓаат во долните дишни патишта.
“Имаме патоген кој е во горните дишни патишта во кои има најголема количина вирус во моментот кога само што почнувате лошо да се чувствувате“, објасни Рајан.
