Во извештајот на регионалната канцеларија на СЗО, објавен вчера стои дека затворањето на училиштата може негативно да влијае на исхраната и физсичката активност кај децата, оти им недостасуваат оброците во училиште и училишните активности.
“КОВИД-19 би можел да влијае на влошување на еден од загрижувачките трендови во европското подрачје на СЗО, а тоа е појавата на се почеста гојазност меѓу децата“, вели Ханс Клуге, регионален директор на СЗО за Европа.
Тој додава дека прекумерната телесна тежина и дебелината подоцна се поврзуваат со болести опасни по живот, како кардиоваскуларни заболувања, дијабетес и рак.
За да се избегне негативното влијание на коронавирусот на иднината на децата, Клуге повика на донесување на научно основани политики чија цел е промовирање на здрава исхрана и телесна активност, а притоа, меѓу другото се мисли на воведување на данок за засладените напитоци, стои во извештајот.
На основа на истражувањето спроведено во 36 земји, утврдено е дека речиси секое трето дете во европската регија на возраст помеѓу шест и девет години страда од прекумерна телесна тежина.
