Преку глава ви е од тоа се во домот да е на ваш грб. Често се наоѓате во улога на куварка, аниматор, таксист, келнер, домашна помошничка и асистент во учењето со хроничен недостаток на уште некој денар во рацете. За време за себе не се осмелувате ниту да размислувате. Можеби во овој момент тоа звучи нереално, но со неколку информации за возрасните карактеристики и способности на децата, тоа е можно брзо и ефикасно да се промени.
Еве неколку примери применливи за повеќето од децата според возраста:
ДЕТЕ ОД 2 И 3 ГОДИНИ МОЖЕ:
- Да си ги раскрене играчките
- Да се облече со мала помош
- Својата валкана облека да ја стави на предвиденото место
- Да учествува во поставување на масата за јадење
- Да користи лажица и вилушка
- По оброкот да ја однесе чинијата во мијалникот
- Да се измие и да ги измие забите со мала помош
- Во случај да истури нешто, со асистенција да избрише
ДЕТЕ ОД 4 И 5 ГОДИНИ ПЛУС ГОРЕ НАВЕДЕНОТО МОЖЕ И:
- Да избрише прашина во својата соба од полиците што може да ги дофати
- Да раскрене помали делови од облеката во својот плакар (чорапи, долна облека)
- Да се исчешла и да се истушира со помала асистенција
- Да си го намести креветот
- Да го нахрани домашното милениче
ДЕТЕ ОД 6 И 7 ГОДИНИ СО ПЛУС ГОРЕ НАВЕДЕНОТО МОЖЕ И:
- Да ја сортира и раскрене својата облека
- Самостојно да се истушира
- Да го избрише тоалетот по користење
- Да помогне во раскревање на купени намирници
- Самостојно да си подготви појадок и ужина (житарки со млеко, сендвич)
- По оброкот самостојно да ја раскрене масата
- Да ги сортира садовите во машина со мала помош
ДЕТЕ ОД 8 И 9 ГОДИНИ МОЖЕ И:
- Да води сметка за личната хигиена без потсетување од возрасно лице (да измие коса, да исече нокти)
- Да исчисти со правосмукалка и да го избрише подот
- Да сошие копче
- Да состави листа за купување намирници
- Според рецепт да подготви едноставен оброк (палачинки, омлет)
- Да води сметка за местење на аларм и на време да станува наутро
ДЕТЕ ОД 10, 11 И 12 ГОДИНИ МОЖЕ И:
- Самостојно да користи машина за перење и сушење алишта
- Да пегла
- Да промени постелнина
- Да испланира и да подготви оброк со неколку намирници (тестенини со сос од домати)
- Подолго самостојно да престојува дома
- Самостојно да учи и да пишува домашна работа
ДЕТЕ ОД 13, 14 И 15 ГОДИНИ:
- Самостојно да подготви малку посложен оброк (вариво од зеленчук)
- Да користи и да ја исчисти рерната
- Да промени сијалица
- Самостојно да изврши мала набавка
- Самостојно да оди на слободни активности
- Самостојно да го планира времето за извршување на училишните обврски
ДЕТЕ ОД 16,17 И 18 ГОДИНИ МОЖЕ И:
- Самостојно да испланира и подготви сложен оброк
- Да го измие автомобилот
- Да води сметка за своите систематски прегледи (лекар, стоматолог)
Наведените возрасни карактеристики се замислени како рамковен водич, оти секое дете е единствено во својот развој и интереси. Затоа, најдобро е сами да процените за што и кога вашите деца се подготвени, оти вие најдобро ги познавате!
