ТОКСОПЛАЗМОЗА ВО БРЕМЕНОСТА: Кои се опасностите и како да се спречи?

За време на бременоста, потребно е посебно да се грижите за сопственото здравје и да внимавате на превенцијата од заразни болести. Иако домашните миленичиња вообичаено не предизвикуваат сериозни болести кај луѓето, трудниците мора да бидат особено внимателни за нивниот контакт со животните, особено со мачките.

Токсоплазмозата е паразитска инфекција предизвикана од протозоата Toxoplasma gondii. Поради можноста за пренесување на инфекцијата на фетусот, токсоплазмозата претставува сериозна закана за бремените жени и за здравјето на нероденото дете.

Како се јавува инфекција со токсоплазма кај бремени жени?

Паразитот Toxoplasma gondii се размножува во дигестивниот тракт на мачките. Затоа, најчестиот начин за пренесување на инфекцијата е со внесување на паразитот преку храна или вода контаминирана со измет од мачки. Имено, инфекцијата со токсоплазма може да се појави на неколку начини.

  • Контакт со измет од мачки што го содржи паразитот
  • Консумирање на сурово или недоволно варено месо кое го содржи паразитот
  • Неизмиено овошје и зеленчук контаминирани со паразитот

Опасности од конгенитална токсоплазмоза на фетусот

Вродената  (конгенитална) токсоплазмоза кај фетусот се јавува како резултат на примарна (прва) инфекција на мајката за време на бременоста.

Ризикот од пренесување на инфекција на фетусот зависи од стадиумот на бременост. Колку порано се појави инфекцијата во бременоста, толку е помал ризикот од пренесување на фетусот, но последиците се потешки, вклучувајќи спонтан абортус и вродени аномалии на фетусот (оштетување на мозокот, очите и сл.). Повеќето инфекции се појавуваат подоцна во бременоста , во текот на третиот триместар, но болеста обично не се препознава веднаш по раѓањето, туку се манифестира со оштетувања кои се појавуваат подоцна во животот.

Како да се спречи токсоплазмоза во бременоста?

Во продолжение ви пренесуваме неколку препораки за намалување на ризикот од инфекција со токсоплазма и зачувување на здравјето на трудниците и нероденото дете.

  1. Избегнувајте да јадете сурово или недоволно варено месо
  2. Овошјето и зеленчукот темелно измијте ги пред консумација
  3. Избегнувајте контакт со измет од мачки

Иако токсоплазмозата во бременоста е опасна, повеќето трудници раѓаат сосема здрави деца! Со следење на превентивни мерки и редовни лекарски прегледи, ризикот од инфекција може значително да се намали. Информацијата и претпазливоста се најдобри сојузници во заштитата на здравјето на трудниците и на нероденото дете.

ПОВРЗАНИ НАПИСИПОВЕЌЕ ОД АВТОРОТ