Првата прегратка помеѓу мајката и детето, контактот кожа на кожа, е основен чекор кој лекарите го препорачуваат бидејќи ја пренесува мајчината топлина и заштитните бактерии на новороденчето. Светската здравствена организација дури ја нарекува првата прегратка помеѓу мајката и детето „прегратка која спасува живот“.
Контактот кожа на кожа, без разлика дали преку гушкање, држење или кое било друго изразување на физичка наклонетост, продолжува да биде од витално значење за благосостојбата на детето во детството, но и подоцна.
„Повисоката самодоверба, подобрата комуникација помеѓу родителот и детето и помалку психолошки и бихејвиорални проблеми се поврзани со топлината и приврзаноста меѓу родителот и детето“, вели Кристофер Бергланд од Child Trends, непрофитна истражувачка организација.
Извештаите на нивната организација покажуваат дека 90 отсто од родителите на деца под три години ги гушкаат своите малечки секој ден. Меѓутоа, покажувањето наклонетост се намалува како што децата растат, при што само 74 отсто од мајките и 50 отсто од татковците ги гушкаат своите деца постари од 10 години.
Затоа решиле да соберат докази кои покажуваат како навиката за гушкање на која било возраст може да им користи на децата. „Научното истражување е секогаш корисна потврда за тоа колку е важно да се практикуваат љубов и добрина и да се покаже љубов кон луѓето што ги сакаме“, објаснува Бергланд.
- Му помага на детето да се чувствува помалку под стрес
Дали чувствувате дека вашиот стрес и исцрпеност исчезнуваат кога ќе се вратите дома кај вашите малечки по долгиот работен ден? Децата се чувствуваат исто. „Родителската топлина и нежност штитат од штетните ефекти на токсичниот стрес во детството“, се вели во студијата спроведена на Универзитетот во Калифорнија. Од друга страна, истражувачите откриле дека занемарувањето во детството, заедно со намаленото покажување на наклонетост, може да влијае на физичкото и психичкото здравје на детето во текот на животот, што доведува до негативни последици, како што е лошото здравје.
- Поради покажување нежност при игра – детето се чувствува сакано
Студија од 2013 година ги проучувала мајките и децата за време на играњето. Истражувачите откриле дека мајките кои покажуваат поголема приврзаност и поттикнуваат чувство на удобност и слобода за време на играта, имаат посилни врски со своите деца. „Децата чии родители поминуваа премногу време на „контрола“ и водење на играта покажаа повеќе негативни чувства кон нивните мајки“, се вели во студијата.
„Знаеме дека децата, без оглед на културата, треба да се чувствуваат сакано. Децата го „впиваат“ значењето на она што нивните мајки се обидуваат да го прават. Ако мајката сака да ги контролира работите, но генерално е топла личност, детето најверојатно ќе почувствува „Мајка ми го прави ова затоа што се грижи за мене и се обидува да го направи она што е најдобро за мене“.
- Помага да се подигне посреќно и ментално постабилно дете, а еден ден и возрасен
Топлината на прегратката може да трае со години! Во една студија од Универзитетот во Нотр Дам, повеќе од 600 луѓе биле анкетирани за начинот на кој тие биле воспитувани, а истражувачите откриле добри вести за родителите кои покажуваат многу нежност.
„Луѓето кои добивале многу наклонетост во детството покажале помалку депресија и анксиозност и во целина биле многу повеќе сочувствителни“, вели авторот на студијата Санди Шварц, додавајќи дека луѓето кои добивале помалку наклонетост се борат со психолошки проблеми, биле поанксиозни во социјални ситуации и многу помалку биле способни да се идентификуваат со другите луѓе.
Затоа, мајки и татковци, повелете и покажете љубов бидејќи сите тие бакнежи и прегратки значат многу повеќе отколку што мислевте!
