Феноменот на „цитокинска бура“ или претеран имунолошки одговор на организмот кој резултира со тешки воспалителни промени, се чини дека има клучна улога во тешката болест Ковид-19, пренесува АФП, додавајќи дека лекарите во моментов се беспомошни.
Претераната реакција на имунолошкиот систем се смета за главен фактор за катастрофалното затајување на органите и смрт кај некои пациенти заболени од новиот сој на коронавирус, но засега сè уште не е јасно до кој степен тешката пневмонија кај критично болните пациенти со Ковид-19 се должи на вирусот или компликации поради претераната реакција на организмот.
Потешкотии при дишењето, чувство на притисок на белите дробови, усни и лице кои добиваат сина боја се знаци на тревога и бараат итна медицинска интервенција, предупредува и Американскиот центар за контрола и превенција на болести (CDC)
Цитокините се протеини со мала молекуларна маса кои делуваат како посредници помеѓу деловите на имунолошкиот систем. Тие се излачуваат од разни клетки како што се лимфоцити, моноцити, макрофаги и фибробласти. Цитокинската бура е процес во кој нашиот имунолошки систем при средба со непознат вирус, реагира со прекумерно размножување на клетките на имунолошкиот систем кои лачат цитокини, кои пак ги активираат новите клетки на имунолошкиот систем.
Влошувањето доаѓа нагло
Треска, замор, сува кашлица – во четири од пет случаи на зараза со коронавирус симптомите се „бенигни или умерени“, но исто така може да дојде и до отежнато дишење и развој на тежок респираторен синдром. Ова се случува кај еден од пет или шест случаи кога е потребно хоспитализирање, соопшти Светската здравствена организација (СЗО).
Потешкотии при дишењето, чувство на притисок на белите дробови, усни и лице кои добиваат сина боја се знаци на тревога и бараат итна медицинска интервенција, предупредува и Американскиот центар за контрола и превенција на болести (CDC).
„Повеќето хоспитализирани пациенти добиваат тешко воспаление на белите дробови и болеста ги зафаќа обете крила, препознатиот „потпис“ на болеста. Влошувањето често доаѓа нагло, седум дена после појава на првите симптоми“, објаснува Јаздан Јазданпанах, шеф на одделот за инфективни болести на болницата „Bichat“ во Париз.
Оневозможен влез на кислород во крвотокот
Хиперимуната реакција – хиперпродукцијата на цитокини предизвикува затнување на алвеолите во белите дробови, се создава едем што го спречува влезот на кислород во крвотокот, ги затнува крвните садови во бубрезите и другите органи, и за кратко време доведува до откажување на виталните системи на организмот, при што, истакнуваат лекарите, најлошо е што таквата реакција се случува многу брзо, во рок од 24 до 48 часа, а докторите се буквално немоќни да направат што било.
Состојбата каде белите дробови не ги снабдуваат виталните органи со доволна количина на кислород бара употреба на респиратор.
„Имаме се повеќе докази кои укажуваат на тоа дека дел од пациентите заболени од тежок облик на Ковид-19 подлегнуваат на синдромот на цитокински шок“, напиша во својот труд за медицинскиот часопис „Lancet“, лекарката Џесика Мансон од University College Hospital во Лондон.
„Во моментот не постои ефикасен терапевтски третман против овој феномен“, изјавија лекарите од париската болница. Тие исто така предупредуваат дека примената на кортикостероиди, противвоспалителни лекови, би можеле да бидат штетни за пациентите заболени од новиот коронавирус.
