На развојот на децата влијаат многу работи, меѓу другото, физичката активност, учењето, спиењето. Овие активности на децата им се потребни секој ден, а не е сеедно ниту колку – постои одреден број часови сон, физичка активност и учење кои се оптимални за развој.
Научниците од Универзитетот во Јужна Австралија, чие истражување е објавено во стручното списание Journal of Bone and Mineral Research, анализирале 804 деца од Австралија, на возраст меѓу 11 и 13 години, по што направиле формула за оптимален баланс на активностите во текот на денот.
Според нивниот заклучок, вака треба да изгледа денот на децата на оваа возраст:
- Час и половина физичка активност дневно (спорт или некои игри за кои е потребна физичка активност)
- 3,4 часа лесна физичка активност дневно (пешачење и извршување на некои домашни работи)
- 8,2 часа седење (училиште, домашна работа, читање)
- 10,9 часа сон
Имајќи предвид дека 90 отсто од коскената маса во телото се формира на возраст од 18-20 години, детството и адолесценцијата се исклучително важен период за силни и здрави коски, нагласуваат експертите.
Тие истакнуваат дека покрај физичката активност, спиењето е подеднакво важно за здравјето на коските, особено за момчињата. Како што се испоставило, на момчињата им требаат околу два и пол часа сон повеќе од девојчињата за да можат нивните коски да се развиваат нормално.
