Вакцината е наменета само за возрасни, лица постари од педесет години, здравствени работници и персонал во домовите за стари и изнемоштени лица
Шефицата на работната група на британската Влада за пронаоѓање вакцина против коронавирус, Кејт Бингам изјави дека вакцинирањето на целото население во Велика Британија нема да биде можно и дека првенствено ќе се вакцинираат постарите лица и вработените кои се изложени на најголем ризик.
„Нема да се вакцинираат помлади од 18 години. Оваа вакцина е наменета само за возрасни, лица постари од педесет години, здравствени работници и персонал во домовите за стари и изнемоштени лица“, изјави Бингам во разговор за „Фајненшл тајмс“, по изјавата на премиерот Борис Џонсон, кој рече дека очекува следните неколку месеци на пандемија да бидат тешки, но дека сè ќе се промени радикално од пролетта.
„Луѓето зборуваат за тоа дека во одреден момент ќе се вакцинира целата популација, но тоа е погрешно“, рече Бингам, додавајќи дека вакцинирањето на здрави луѓе, кои се изложени на многу помал ризик од тешки последици од COVID-19, „би можело да нанесе одредена штета“.
Велика Британија го премина прагот од 500.000 случаи на инфекција со коронавирус во неделата, од кои 42.300 починаа, што е најмногу во Европа.
„Тајмс“ минатата недела, повикувајќи се на научниците, објави дека вакцината против COVID-19 во Велика Британија би можело да биде готова за само три месеци, додавајќи дека здравствените работници проценуваат дека сите возрасни лица би можеле да примат доза од вакцината во рок од шест месеци.
Бингам рече дека планот на владата е да се вакцинираат околу 30 милиони луѓе, од вкупно 67 милиони жители на Велика Британија, доколку се пронајде успешна вакцина.
