Дебелите луѓе имаат за 48 % поголема веројатност да умрат од COVID-19, a вакцината може да не им делува добро, затоа што нивниот имунолошки систем е послаб, предупредуваат научниците
Дебелината ги прави другите болести како дијабетес и висок крвен притисок поверојатни, велат американските научници, а пренесува Би-Би-Си.
Овие лица, често имаат и ослабен имунолошки систем што ги прави поподложни на сериозни симптоми на COVID-19. Научниците исто така предупредуваат дека вакцината против коронавирус може да биде помалку ефикасна кај дебелите луѓе.
„Тоа се заснова на фактот дека вакцините против грип делуваат послабо кај луѓе со индекс на телесна маса (БМИ) поголем од 30“, пишува Би-Би-Си. Тим од Универзитетот во Северна Каролина ги разгледал податоците од 75 студии од целиот свет за потребите на нивната студија, вклучувајќи скоро 400.000 пациенти. Откриле дека луѓето со дебелина и COVID-19 имаат двојно поголема веројатност да завршат во болница и 74 проценти поголема веројатност да бидат примени на интензивна нега. Тие исто така имаат 48 проценти поголем ризик да умрат од COVID-19.
И студиите од Велика Британија покажале слични ризици кај луѓето со прекумерна телесна тежина, поради што Владата воведе нови мерки за борба против дебелината. Професорот Бери Попкин, кој го водеше истражувањето од Катедрата за исхрана на Универзитетот во Северна Каролина, изјави дека ризиците за дебели лица кои ќе заболат од COVID-19 се многу поголеми отколку што се очекувало. Тој вели дека здравата исхрана мора да биде приоритет во многу земји, со помалку зашеќерени пијалаци и значително помалку нездрава и преработена храна.
Дебелината, исто така, може да доведе до повеќе воспаленија во организмот, да ја намали способноста на организмот да се бори против инфекции и да го зголеми оптоварувањето на другите органи, како и на дишењето. „Истражувачите на вакцини треба да разгледаат како тоа влијае на дебелите поединци“, изјави проф. Попкин за вакцината против коронавирус.
