Минатата недела Американската академија за педијатрија упати јавна молба до родителите да ги вакцинираат децата против грип, а се поради стравот од “двојна“ пандемија – КОВИД и грип.
“Во текот на оваа пандемија важно е да се запомни дека и грипот е многу агресивна респираторна болест, многу е заразен и може да предизвика сериозни состојби, па дури и смрт кај децата“, истакнува д-р Флор Муноз од Универзитетот Бајлор.
“Вакцината против грип е безбедна, ефикасна и може да се прими со останатите вакцини за заштита, па дури и со онаа против коронавирусот“ се додава таа.
Д-р Дин А. Блумберг, шеф на педијатрија и заразни болести во болницата Дејвис хелт, додава дека вакцината е одлична кога е во прашање превенција од сериозните последици од грипот.
СОЗДАВАЊЕ АНТИТЕЛА
Вакцината против грип содржи парцијален вирус на грип, имуниот систем реагира на тој вирус така што создава имунолошки одговор, антитела кои ќе можат да се борат против вирусот кога ќе дојде во организмот. Вакцината може да спречи инфекција, а ако се разболите, спречува сериозни состојби и последици, објаснува тој.
ДЕЦА И ГРИП
Децата на училишна возраст може да се вакцинираат против грип исто како и децата кои одат во градинка, односно на таа возраст. Вакцината е регистрирана за деца над шест месеци. Споре информациите од Институтот за јавно здравје, под поголем ризик за компликации, освен возрасните лица над 65 години, бремените жени и лицата со хронични болести, се и децата на возраст од шест месеци до 5 години.
Според последните информации на страната на Институтот, од 28 мај оваа година, во сезоната 2020/2021, вкупниот број на заболени од грип/ заболувања слични на грип изнесува 1.127 (I=54,5/100.000). Во споредба со истиот период од минатата сезона (n=33.171), постои намалување на вкупниот број на пријавени случаи за 29,4 пати, а во однос на моделот за последните 10 сезони (n=26.322) се регистрира намалување од 23,4 пати.
Дека децата помлади од 5 години се во ризична група од компликации предизвикани од грип, тврди и д-р Вилјам Шафер, стручњак за инфективни болести на Универзитетот Вандербилт.
“Истражувањата упатуваат на тоа дека голем број смртни случаи поврзани со грип се случуваат кај деца кои не се вакцинирани. Ако погледнеме во минатото, околу 80 проценти од тие деца не биле вакцинирани, а повеќето биле многу здрави. Вториот дел од децата имале некои постоечки болести и така биле поподложни на вирусот“, додава експертот.
Тој потенцира и дека децата помали од пет години се во посебна опасна ситуација од развој на компликации од грип, а тоа вклучува воспаление на белите дробови, проблеми со синусите, дифункција на мозокот, дехидрација или влошување кое може да следи, како астма.
Д-р Блумберг смета дека децата можат да бидат во особена опасност оваа година, поради пониската циркулација на грип минатата сезона.
“Децата може да бидат поранливи на грип оваа година, бидејќи немаа минатата. Со помалку вируси на грип во воздухот минатата година поради рестрикциите поврзани со пандемијата, децата не можеа да стекнат никаков имунитет “, објаснува тој.
