Кога чекате бебе, постојат толку многу работи за кои размислувате, а секако најважната задача на секоја идна мајка е да се грижи за своето здравје. Ова подразбира преземање на сите чекори за спречување на некои инфекции кои можат да бидат потенцијално опасни и за бебето, а една од нив е цитомегаловирус или ЦМВ.
Овој вирус е многу чест, а според податоците на Американскиот центар за контрола и превенција на болести, едно од три деца се заразуваат со ЦМВ до петтата година, додека повеќе од половина од возрасните го имаат овој вирус до 40. година.
Лицето кое еднаш имало цитомегаловирус секогаш ќе го има, но обично по инфекцијата овој вирус останува неактивен во телото.
Како да знаете дали имате ЦМВ?
Често се случува овој вирус да не покажува никакви симптоми, па луѓето и не ни знаат дека го имаат. Меѓутоа, кај некои може да има симптоми. Постојат три типа на цитомегаловирус, а еве кои симптоми ги предизвикуваат:
Акутен ЦМВ – кај некои луѓе предизвикува симптоми слични на грип, како треска, замор, болки во коските.
ЦМВ кај имунокомпромитирани лица – кај оние кои имаат ослабен имун систем, овој вирус може да доведе до сериозни болести кои ги влијаат на очите, мозокот и дигестивниот тракт.
Конгенитален ЦМВ – се јавува кај бебињата додека се уште се во матката, и може да доведе до потенцијално сериозни последици. Едно од пет бебиња со вроден цитомегаловирус има долгорочни здравствени проблеми.
Зошто ЦМВ е ризичен во бременоста?
Цитомегаловирусот е многу чест, а Центарот за контрола и превенција на болести наведува дека повеќето трудници го имаат уште пред првата бременост. Помал број од нив, меѓу еден и четири отсто, ќе ја добијат инфекцијата за време на бременоста.
Доколку имате ЦМВ, можно е да се пренесе на бебето бидејќи вирусот се наоѓа во крвта и може да стигне до плодот преку плацентата. Сепак, шансите бебето да го добие овој вирус се поголеми доколку се заразите со него во текот на бременоста.
Цитомегаловирусот во бременоста носи одреден ризик бидејќи може да предизвика компликации доколку се пренесе на бебето, а во некои посериозни случаи може да доведе и до губење на бременоста, пишува healthline.com.
Ако бебето се роди со овој вирус, тоа се смета за вроден ЦМВ, а овие бебиња може да имаат некои краткорочни и долгорочни здравствени компликации:
- Ниска родилна тежина
- Осип на кожата
- Жолтица
- Зголемен црн дроб или слезина
- Микроцефалија, односно глава помала од просечната
- Напади
- Губење на слухот
- Губење на видот
- Интелектуална попреченост
- Задоцнување во развојот
Симптоми на ЦМВ во бременоста
Повеќето луѓе кои го имаат овој вирус немаат никакви симптоми, поради што ниту повеќето трудници не знаат дека ја имаат инфекцијата. Меѓутоа, кај некои може да се појават симптоми на акутна инфекција, како што се:
- Трески, со или без треперење
- Замор
- Малаксалост, болки во коските
- Главоболки
- Зголемени лимфни жлезди
Причини и пренос на ЦМВ
ЦМВ е тип на херпес вирус, а експертите го нарекуваат хуман херпесвирус-5 (HHV-5).
Цитомегаловирусот се пренесува преку директен контакт со телесните течности кои го содржат вирусот, имено крв, урина, семената течност, вагиналната течност, плунка, солзи, мајчиното млеко. Вирусот може да навлезе во телото доколку дојдете во контакт со некоја од споменатите телесни течности, а потоа го допрете носот, устата или очите.
Исто така, ЦМВ може да се пренесе преку бременост и породување, доење, бакнување, контакт со валкани пелени, интимни односи, споделување работи како четка за заби, прибор за јадење, чаши…
Дијагноза на ЦМВ
За да се утврди дали некое лице има цитомегаловирус, се прават лабораториски тестови за да се провери дали има ЦМВ антитела во крвта.
Третман на ЦМВ
За цитомегаловирусот нема лек, но по една инфекција го имате засекогаш во вашето тело, како и другите херпесвируси.
Кога станува збор за бремени жени со ЦМВ, некои антивирусни лекови можат да помогнат да се стави инфекцијата под контрола, но тие не можат секогаш да спречат вирусот да се пренесе на бебето.
Научниците работат на истражување на антивирусни лекови кои би можеле безбедно да го спречат преносот на цитомегаловирус во текот на бременоста. Покрај тоа, на бебињата родени со симптоми на ЦМВ понекогаш им се даваат антивирусни лекови кои можат да го намалат ризикот од долгорочни здравствени компликации.
