Илјадници години мајките ги заспиваат бебињата со приспивни песни, татковците смислуваат симпатични песнички за бељите на децата, на семејствата музиката е дел од секојдневниот живот. Зошто? Бидејќи музиката смирува, развеселува, поттикнува развој на говорот, и во повеќето случаи во неа подеднакво уживаат и децата и родителите.
Поранешни истражувања дошле до заклучок дека музиката може дури и да ја развие и да ја зголеми интелегенцијата кај бебињата (т.н. “Моцарт ефект“).
Она што научниците го докажале е и дека музиката:
- Поттикнува рано учење
- Ги подготвува бебињата подоцна да уживаат во музиката
- Го учи бебето како да комунницира
- Поттикнува помнење
- Го поттикнува бебето на движење (танц)
- Има смирувачки ефект
Музиката и бебето
Истражувањата покажале дека дури и кога се во стомакот, бебињата реагираат на музика и мелодија. Слухот во целост е развиен во третото тромесечје и кога фетусот постојано слуша иста мелодија, по раѓањето истата ќе ја препознае и ќе почувствува утеха. Доколку класична музика му се пушти на предвреме родено бебе, отчукувањата на срцето ќе се забават и дишењето ќе се стабилизира, што покажува дека музиката помага во намалувањето на стресот и кај најмалите бебиња. Кај вознемиреното и нервозно бебе музиката може да помогне тоа да се смири. На бебето му е сеедно дали имате убав глас или воопшто немате слух, се додека ве слуша, ќе ужива и ќе биде мирно.
Како дополнително да ги поврзете новороденчето и музиката?
Ритмичко движење Кога бебето е вознемирено, држете го во прегратка, пејте му, играјте и движете се во ритам со музиката. Комбинацијата од близок телесен контакт, движење и музика може да направи чуда кога е во прашање смирување на расплакано бебе.
Испробајте различни видови музика
Обидете се со бебето да слушате и да пеете различни видови музика, да видите како ќе реагира. Кога е вознемирено, можеби ќе реагира на приспивни песни. Кога е весело, можеби ќе сака да заигра со повесела музика. Кога е тивко и замислено, можеби ќе ужива во класичната музика…
Оживејте ги вашите омилени детски песни
На своето дете пејте му ги омилените приспивни или други песни, на кои се сеќавате од вашето детство. Тоа терапевтски ќе делува и на вас.
ВОСПОСТАВЕТЕ РУТИНА
Користете музика за на своето бебе да му дадете до знаење што се случува и за да воспоставите смирувачка рутина:
- Пуштете иста смирувачка музика секогаш кога се подготвувате да го масирате бебето
- Пејте ја истата приспивна песна секоја вечер, додека го заспивате бебето
- Во автомобилот имајте ЦД со омилените песни на вашето дете
- За време на капењето пуштете класична музика која опушта
- Кога мора да подготвите ручек или да сработите нешто друго, а детето е вознемирено, пуштете му ги неговите омилени песни (весели или смирувачки) за да му го окупираат вниманието
