Овој потег е дел од обидот да се запре асимптоматското ширење на инфекцијата бидејќи училиштата во Англија треба да бидат отворени на 8 март
Сите семејства во Англија кои имаат деца на училишна возраст ќе добијат бесплатен прибор за тестирање на коронавирус во домашни услови, објави Владата во Лондон.
Тестовите ќе им бидат испратени на децата и нивните родители, како и на луѓето кои работат со училишни деца, како што се, на пример, возачите на автобуси. Секоја личност ќе добие по два теста неделно, според овој план.
Децата во средните училишта ќе бидат тестирани три пати во училиштата на почетокот на учебната година, пред да бидат тестирани дома.
Тестовите не се задолжителни.
Овој потег е дел од обидот да се запре асимптоматското ширење на инфекцијата бидејќи училиштата во Англија треба да бидат отворени на 8 март.
„Знаеме дека едно од три лица со Ковид-19 нема симптоми, така што ваквото насочено, редовно тестирање ќе значи да се држат позитивните случаи подалеку од училиштата и факултетите“, рече министерот за здравство Мет Ханкок.
Тестовите овозможуваат резултатот во рок од половина час. Меѓутоа, се смета дека не се многу сигурни.
Секој што ќе добие позитивен резултат мора потоа да направи PCR-тест, порача британската влада.
