Киноата – мајка на житарките, денес се одгледува само органски што е уште една причина плус зошто треба да се користи во почетокот на дохраната на бебето.
Киноата, секако дека не е вообичаена намирница од нашето подрачје, но со развивање на свесноста за здравата исхрана, и оваа егзотична житарка е достапна на полиците во продавниците за храна. Киноата е една од најстарите житарки во светот, и ја одгледувале уште Инките. Со оглед дека киноата била основна намирница со која се прехранувал древниот народ, ја нарекле и мајка на житарките, Посебниот благо – горчлив вкус што ја карактеризира киноата, бара одредено време на навикнување, но кога еднаш ќе ја засакате, секогаш ќе има свое место во вашата исхрана.
Одлично годи како самостоен прилог, но и во комбинација со други житарки (ориз, просо). Киноата, како и останатите житарки е богата со белковини, аминокиселини, калциум, железо, влакна, витамини А и Б, како и фосфор.
Важно е да се напомене дека киноата не содржи глутен и како таква е проверена за исхраната на лицата кои имаат целијакија. Се препорачува, киноата да биде една од житарките за почетокот на дохрана кај бебињата: лесно се вари, хипоалергена е и не содржи глутен, па бебињата може да ја консумираат веќе од шестиот месец од животот.
Дополнителна причина за тоа е и фактот, дека киноата, поради својата чувствителност, се одгледува единствено органски.
