ПИШУВА:
Катерина Шекеровска-Димовска
katerina@pedijatar.mk
Со поздравен говор на проф. д-р Маријан Бошевски, претседател на Организацискиот одбор, вчеравечер и официјално беше отворен Четвртиот меѓународен симпозиум за тромбоза и крвни садови, кој се одржува викендов (15-16 мај 2026 година) во хотелот DoubleThree by Hilton, Скопје.
„Овој пат како и првиот пат сум возбуден дека правиме нешто, а дури сега сум свесен дека направивме многу. Во 2019 година, испровоцирани од новите водичи за пулмонална емболија, коишто се сè уште актуелни, а во очекување сме на новите, го организиравме првиот симпозиум за тромбоза, кој официјално беше поддржан од Европското здружение по кардиологија“, истакна проф. д-р Бошевски. „Во меѓувреме направивме симпозиум за крвни садови, а оваа година, заедно со претседателката на Македонското здружение по кардиологија, решивме да ги споиме во едно – симпозиум за тромбоза и крвни садови“, додаде проф. д-р Бошевски.
Добредојде на присутните, покрај проф. д-р Бошевски, им посака и претседателката на Македонското здружение по кардиологија виш науч. сор. д-р Ирена Митевска.
„Денеска сме сите овде заедно обединети во една заедничка цел: да го унапредиме нашето знаење и разбирање за тромбозата, да го подобриме лекувањето на нашите пациенти и да ја зајакнеме меѓународната соработка во кардиоваскуларната медицина. Тромбозата и васкуларните заболувања, за жал, се сè уште водечка причина за смртност и во светот и во нашата земја, претставувајќи предизвик не само за нас како лекари, туку и како едукатори, промотори на превенцијата и современиот третман на пациентите“, истакна виш науч. сор. д-р Митевска.
Во име на Лекарската комора на РСМ, присутните ги поздрави доц. д-р Беким Исмаили, а пленарно предавање за новите американски водичи за пулмонална емболија, насловено „Pulmonary Embolism: Through the Lens of the 2026 AHA/ACC Guideline and Beyond“ одржа проф. д-р Бехнуд Бигдели (Brigham and Women’s Hospital-Boston, Harvard Medical School и Yale/YNHH Center for Outcomes Research).
Четвртиот меѓународен симпозиум за тромбоза и крвни садови се одвива во пријатна и инспиративна атмосфера со присуство на врвни експерти од земјата и странство, кардиолози, специјалисти по васкуларна медицина, интерна медицина, хематологија и трансфузиона медицина, дерматологија, семејна медицина, како и супспецијалисти и специјализанти. Симпозиумот опфаќа повеќе аспекти на артерискиот и венскиот тромбемболизам, тромботичните компликации, артериската болест, третман на канцер-асоцирана тромбоза, пропратени со искуства од реалната практика, нивна превенција, дијагностички предизвици и современо лекување.
Симпозиумот опфаќа повеќе аспекти на артерискиот и венскиот тромбемболизам, тромботичните компликации, артериската болест, третман на канцер-асоцирана тромбоза, пропратени со искуства од реалната практика, нивна превенција, дијагностички предизвици и современо лекување
Засебен осврт е посветен на ризик-факторите и коморбидитетите кои доведуваат до тромбоза, а посебно внимание е посветено на новите препораки за третман на белодробната тромбоемболија.
Во рамки на официјалното отворање на симпозиумот му беше доделена и плакета на проф. д-р Слободан Обрадовиќ од Србија, во знак на искрена благодарност за соработката и несебичната поддршка на активностите на Македонското здружение по кардиологија.
Тромбозата и заболувањата на крвните садови се едни од најсериозните предизвици на современата медицина, што значително влијаат врз здравјето и квалитетот на животот на пациентите. Ваквите стручни симпозиуми имаат големо значење бидејќи им овозможуваат на лекарите и на здравствените професионалци да се запознаат со најновите научни сознанија, современи дијагностички методи и терапии, со цел континуирана едукација која е неопходна за подобра грижа за пациентите.
