Нема сомнеж дека времето се менува и дека бурите стануваат сè посилни, понеочекувани, ненадејни и застрашувачки. Не е реткост да сретнеме и возрасни на кои не им е пријатно во такви ситуации, па дури и отворено признаваат дека се плашат од невреме, особено од грмежи.
Вистина е дека за многу деца, но и за возрасни, грмежливите бури можат да бидат извор на голема вознемиреност и страв. Звукот на силните громови, молњите и сирените за предупредување можат да предизвикаат непријатност, солзи, па дури и физички симптоми како болка во стомакот или забрзано дишење.
Психолозите истакнуваат дека клучот за намалување на детската анксиозност е однапред да се има осмислен план за вакви ситуации.
Испланирајте однапред – „безбедно место“
„Ако слушнеме сирени, знаеме каде е нашето безбедно место во домот каде што ќе се засолниме за да бидеме заштитени“, објаснува д-р Кејтлин Микелсон, психолог од Санфорд Хелт.
Таа додава дека на децата може да им помогне и потсетување на позитивни примери — луѓе кои навреме се засолниле и останале безбедни. Тоа им дава дополнително чувство на сигурност и контрола.
Разговорот прилагодете го на возраста на детето
Начинот на кој разговарате со децата за невреме зависи од нивната возраст и развојна фаза.
„Бидете што е можно поотворени со децата, но на начин што е соодветен на нивната возраст“, советува д-р Микелсон.
За помалите деца (2-3 години), разговорот може да звучи вака:
„Да, надвор има големо невреме и ќе има грмежи, но затоа сега сме во оваа просторија бидејќи тука сме безбедни од силниот ветер.“
Со повозрасните деца (12-13 години), може поотворено да се разговара и да се објасни повеќе за временската прогноза, оддалеченоста на бурата и причините зошто се засолнуваме.
И екраните и играчките можат да помогнат
Иако родителите често се трудат да го ограничат времето пред екран, во вакви ситуации гледањето цртани, играњето игри или гледањето омилени видеа може да биде добра дистракција.
„Ова дефинитивно е момент кога екранот е сосема прифатлив“, вели д-р Микелсон.
„Можете дури да имате и посебни играчки во вашиот ‘комплет за невреме’ кои ќе им помогнат на децата да се забавуваат и да ја намалат напнатоста додека трае бурата.“
Мали рутини што создаваат чувство на сигурност
Покрај екраните или играчките, можете заедно со децата да создадете и ваша рутина за „време на невреме“ — на пример, заедно да читате омилена сликовница, да слушате музика или дури да организирате мал „пикник“ на безбедно место во домот.
Важно е децата да знаат дека ги слушате, дека сте покрај нив и дека им давате чувство на сигурност — и физички и емоционално.
