Научниците од Американскиот центар за превенција и контрола на болести тврдат дека жените имаат посилни несакани ефекти по вакцинацијата, за разлика од мажите.
Здравствените работници Шели и Скот Бломгрен биле меѓу првите кои пристапиле кон вакцинација против Ковид-19 во Америка. По втората доза од вакцината на „Модерна“, тоа исто попладне станало јасно дека Шели има сосема поинаква реакција на вакцината.
„Скот беше добро, а јас се чувствував како да умирам. Инаку сум прилично јака и можам да поднесам болка, но ова беше страшно“, објасни Шели Бломгрен.
Болки, грозница, замор
Таа вели дека се борела скоро два дена со она што го нарекува најсилна болка, грозница и замор што некогаш го доживеала, додека нејзиниот сопруг отишол на работа и продолжил да се однесува како и обично. По два дена, и таа била добро и постепено заштитена. Симптомите и проблемите што ги опиша се чини дека се јавуваат во многу домаќинства во Америка, тврдат експертите.
Според извештајот на Центарот за превенција и контрола на болести на САД, по примањето на првите 13,8 милиони дози, извештаите за несакани ефекти покажале дека несаканите ефекти биле почести кај жените. Дури 79 проценти од пријавените несакани ефекти доаѓаат од жени, иако само 61 процент од вакцината е „потрошен“ на нив.
Резултатите од студијата не се толку загрижувачки за експертите за заразни болести. Истакнуваат дека посилната реакција кај жените била забележана и на други вакцини уште пред неколку години.
Причина
Експертите претпоставуваат дека кај жените, особено кај жените во менопауза, нивоата на естроген се одговорни за активирање на имунолошкиот одговор за време на вакцинацијата. Мажите имаат повеќе тестостерон, хормон кој може да ја забави и намали реакцијата.
Едноставно кажано, жените почесто имаат посилни реакции на вакцината, бидејќи нивното тело е побрзо и посилно кога станува збор за активирање на она што вакцината го внесува во организмот.
Д-р Лери Шлезингер, претседател и шеф на медицинскиот институт во Сан Антонио смета дека естрогенот испраќа сигнали до телото да произведува повеќе Т-клетки, кои нè штитат кога на организмот ќе му се претстави вакцината.
