Кои болести се најчести во градинките и зошто постојано се повторуваат?
Во колектив најчесто се појавуваат болести кои се пренесуваат по капков пат, особено во зимските месеци кога просториите помалку се проветруваат. Тоа се главно вирусно респираторни болести и цревни болести. Кај цревните болести, одредени периоди од годината, кога знаеме дека тие почесто се јавуваат, важно е да се каже дека тие се преносливи фекоорално, што е исклучително ризично за возрасна категорија до три години, кога прстите се често во уста, кога децата меѓусебно се менуваат и шишенца, чаши или цуцли поради што ширењето е многу полесно.
Постојат ли здравствени состојби кај кои престојот во градинка е контраиндициран?
Не постои ниту една хронична болест за која би се рекло дека таа е апсолутно контраиндицирана да детето оди во градинка.
Но, важно е да се каже ако детето има алергиска астма и кај него секој вирусен инфект завршува со бронхоопструкција и честа потреба за примена на лекови или дури и одење во болница, тогаш мора да се признае дека за такво дете, колектив не е препорачлив.
Исто така ако детето има некоја аномалија на уринарниот систем, па е склоно кон уринарнии инфекции,најчесто везикоуретерален рефлукс не може да се каже дека за него не е градинка, но не е препорачливо ако тоа дете е склоно на оние најчести респираторно вирусни инфекции кои му го рушат имунитетот и последично на тоа добива воспаление на бубрезите. Ако тоа често се повторува, тогаш колектив за такво дете не е среќно решение.
Што се однесува до сериозни хронични болести, како срцеви болести или дијабетес, не може да се каже дека тие деца не се за во градинка, напротив тие треба да се вклучат во колектив, но воспитачите и негувателките треба да знаат дали се потребни некои посебни мерки за грижа и како би постапиле во било која ситуација врзана за хроничната болест.
