Однесувањето на детето во голема мера зависи од вниманието што го добива од неговите родители. Кога му недостига внимание, однесувањето на детето може драстично да се промени, а некогаш мирното дете може да стане каприциозно, да стане хистерично, да се буди ноќе…
Не е секогаш можно да се види врската помеѓу однесувањето и недостатокот на внимание, затоа обрнете внимание на овие девет знаци кои може да укажуваат на тоа дека на детето му недостасува родителско внимание.
- Станува се погласно
Децата на кои им треба повеќе внимание често стануваат гласни и нервозни. Кога му требате на вашето малечко, тоа може да го изрази со викање, жалење, со постојано прекинување на вас за да се осигура дека ќе го добие она што го сака.
- Не ве слуша
Дете кое одеднаш станува непослушно, одбива да ги почитува правилата и барањата што му ги упатувате или прави нешто што не е вообичаено за него, можеби на тој начин ви испраќа порака за недостаток на внимание.
- Ги повторува истите работи
Дали вашето дете постојано ви го поставува истото прашање? Дефинитивно со тоа сака да го привлече вашето внимание, смета бихејвиоралниот аналитичар Емили Гробен. Дури и ако детето го знае одговорот, тоа одново ве прашува истото – за да разговара со вас.
- Се осамува
Можеби звучи необично, но детето на кое му треба внимание може и да се повлече од возрасните. Ако забележувате дека детето избегнува да поминува време со вас или со семејството и повеќе ужива да биде само, тоа може да биде сигнал дека му треба ваша поголема емоционална поддршка и внимание.
- Има изливи на емоции
Изливите на емоции се тешки и за децата и за родителите. Најчесто, ваквото однесување, тантрумите, се јавуваат кај многу мали деца. Тие можат да бидат знак дека детето е вознемирено, дека му е потребна вашата поддршка, но во исто време, дека ги нема потребните вештини за справување со овие емоции и со ова однесување бара помош од вас.
- Се жали на здравствени тегоби
Еден од знаците на недостаток на внимание кај децата кој често се превидува се поплаките на децата за физичките тегоби. Некои деца дури и чувствуваат болка од време на време, како што се мигрена или стомачни болки.
- Регресија
Дете кое вообичаено се облекува само, одеднаш бара од вас да го облечете, или можеби спиело цела ноќ без проблеми, а сега одеднаш повторно почнува да се буди во текот на ноќта? Регресиите во однесувањето не се невообичаени, но можат да бидат и знак дека на детето му треба поголемо внимание од родителите.
- Сака да го карате
Ако сте забележале дека детето продолжува да прави нешто дури и откако сте го искарале, најверојатно го бара вашето внимание. Од негова гледна точка, дури и негативното внимание е подобро од никакво внимание, па тоа ќе продолжи да го прави она што не треба, по цена вие повторно да го опоменувате и карате.
- Се „лепи“ за вас
Доколку забележите дека детето буквално ни за момент не сака да се оддалечи од вас, како да е „залепено за вас“, можеби само му треба малку повеќе внимание, а оваа „опседнатост“ со вашата близина би можела да укаже токму на тоа.
