Цицањето на палецот претставува една од најчестите навики во детството. Благодарение на ултразвучните снимки, се знае дека бебето го цица палецот уште во стомакот на мајката. Бебињата имаат вродена, природна потреба за цицање која главно се намалува после шестиот месец од животот. Додека бебето цица (кога мајката го дои или пие млеко од шишенце), тоа има одрдени пријатни сензации кои се поврзани со чувството на ситост, нежност, сигурност. Поради тоа за многу мали деца цицањето на прстот може да биде само начин да се ослободат од чувството на глад.
Се смета дека околу 70-90% доенчиња (бебиња до една година) го цицаат палецот, но повеќето од нив постепено сами се одвикнуваат до 4-5 година.
Доколку детето продолжи да го цица прстот по оваа возраст, веројатно тоа го прави за да се смири, ако се исплашило, или ако е несигурно, ако му е здодеввно или е уморно, па на тој начин се смирува или се успива. Тогаш треба да побарате совет од психолог кој ќе ја открие главната причина на оваа појава и ќе помогне детето да се ослободи од оваа навика без никакви трауми.
Иако цицањето на палците се смета за нормална појава, тоа може да предизвика и сериозни проблеми. Со цицање на палецот детето ги турка забите. Горните заби се испакнуваат нанапред, а долните се повлекуваат наназад. Може да предизвика и збиени, криво израснати заби, а со тоа може да се јават проблеми со говорот кај детето. Оваа појава може да предизвика и проблеми со голтањето.
Родителите често се во дилема палец или цуцла. Некои стручњаци советуваат дека ако забележите дека детето има тенденција на цицање на палецот, тоа спречете го така што му дадете цуцла лажливка. Подоцна е доста полесно да го одвикнете од цуцла отколку од палецот.
Како може да му помогнете на детето да прекине со цицање на прстите?
Бидете внимателни и нежни кон своето дете. Охрабрете го да престане со цицање на палецот. Наградувајте го често. Постепено продолжувајте ги периодите на наградување. Немојте да му префлате, викате, или постојано да го опоменувате, особено во присуство на други. Тоа може да биде контрапродуктивно. Детето мора да научи да ја контролираа оваа навика. Разговарајте за „лошите бактерии„ и нечистотиите кои ќе ги внесе во организмот со својата навика. Внимателно извадете му го палецот од уста додека спие. Некогаш детето од досада ќе го стави палецот во уста, така да е пожелно да се потрудите што почесто да го анимирате. Доколку сами во периодот од 3-4 години не успеете да се изборите со оваа навика, задолжително обратетете се кај детски психолог.
