Децата од најрана возраст сакаат да ставаат во уста се што ќе дофатат. На овој начин тие се обидуваат да ја научат својата околина. Тоа секако не престанува кога дете ќе наполни една година. Може да се случи да ги гризнат другарчињата за рака или пак вас.
ЗОШТО ГРИЗААТ ДЕЦАТА?
Важно е да ги разберете причините поради кои децата ја имаат оваа агресивна навика. Во повеќето случаи тоа може да бидат следниве причини:
- Се обидуваат да го научат светот
Децата сакаат да ги почувствуват рабоитите орално, и така ги разбираат, објаснува Џудит Џерард, психолог и професор по јавно здравје од Минесота.
- На тој начин комуницираат
Покажувањето емоции може да биде тешко за дете на 12 месечна возраст, бидејќи не може вербално да ги искаже. Тие немаат јазични способности да кажат што чувствуваат, па гризаат како би покажале возбуда, фрустрација, анксиозност, па дури и здодевност.
- Тоа им е начин на одбрана
Понекогаш, гризањето е оправдано. Можеби некое дете му ја земало играчката, го искубало за коса и слично. Децата се уште немаат чувство на самоконтрола. Ова најчесто ја објаснува појавата да детето гризе кога е во градинка.
- Преморени се
Често и по преголема стимулација доаѓа до гризање. Затоа по некои исцрпувачки игри и забава, оставете го детето да се смири или да отспие.
КАКО ДА ГО РЕШИТЕ ПРОБЛЕМОТ
Детето едноставно мисли дека гризањето е сосема добра реакција на збунетост или фрустрација. Ваша работа е да на безбеден начин го одвратите од ваквото однесување.
- Веднаш реагирајте
Користете куси зборови и гласен тон. “Не гризи. Тоа повредува“ се зборови со кои детето ќе го насочите на нешто друго, предлагаат педијатрите. Иако децата се уште не ги разбираат вашите зборови, наскоро ќе почнат. Дотогаш го разбираат вашиот тон.
- Охрабрете го детето да користи зборови
Дадете му до знаење на детето дека кога ќе се налути или вознемири, постои друг начин освен гризањето. Може да каже “не“, “не сакам“ или да побара ваша помош.
- Покажете му дека неговите чувства се во ред
Покажете дека ги разбирате неговите фрустрации, и кажете му го тоа. Гушнете го, тоа ќе го смири. Не дозволувајте да ја добие играчката по гризањето или агресивното однесување. Ако стратегијата му успева ќе продолжи да ја применува.
