Како и секоја година, студеното време и зимата ја наметнуваат темата за респираторните болести. Познато е дека во просек детето годишно боледува од 8 инфекции на дишните патишта, а оние деца кои одат во градинка и до 12.
Често си поставуваме прашања зошто некои деца во контакт со истиот причинител развиваат лесна настинка, додека други заболуваат од тешки форми на воспаление на белите дробови. Зошто некои деца се подолго време од другите? Зошто потешко оздравуаат? Зошто некои деца речиси никогаш не се болни или никогаш?
Секако дека сето тоа зависи од видот на причинителот со кои децата се среќаваат, успешноста на терапијата која се спроведува, добрата соработка меѓу педијатарот и родителот, возраста на детето, генетската предодреденост, стилот на живеење, но големо влијание има имунитетот, односно природната одбрана на организмот.
Детето најчесто е болно до третата година животот, бидејќи неговиот имунитет или одбранбен систем не е созреан.
Дури на возраст на 10 до 12 години го достигнува нивото на возрасна личност. Имунитетот го сочинуваат низа одбранбени реакции предизвикани од страни тела и микроорганизми внесени во организмот. Така се создава отпорност кон болестите. Таа природна отпорност или имунитет на детето во најрана возраст зависи од имунитетот на мајката. Веќе за време на бременоста, мајката преку крвта му пренесува на плодот заштитни клетки кои го штитат од инфекции. Првиот подој на новороденчето е првва заштита од мајката, бидејќи тоа млеко е богато со антитела, па од тие причини и се нарекува прва вакцина.
Детето се раѓа со имунитет наследен од мајката и тоа трае во првите неколку месеци од животот. Постепено развива сопствен и тоа со населување на физиолошка бактерсиска флора во усната шуплина и во цревата.
Проблемот се јавува кога имунитетот стекнат преку мајката ќе се потроши, а сопствениот не е созреан, што обично се случува околу осмиот и деветтиот месец од животот.
Тогаш децата се најчувствителни и најнезаштитени од болести и на тоа треба да се мисли во овие есенски и зимски месеци и да се избегнува затворен простор каде престојуваат повеќе луѓе. Во насока на заштита од болести, исхраната на детето треба да изобилува со витамини А, Б6, Ц и Е (млеко, морков, домат, пиперка, морска риба, банани, маслиново масло, зелен зеленчук, овошје), цинк и железо. Движењето го поттикнува имунитетот. При засилена физичка активност, срцето пумпа повеќе крв и со тоа одбранбените клетки побрзо патуваат низ телото. Се препорачува физичка активност барем половина час во денот.
