Постои когнитивна пристрасност наречена „проклетство на знаењето“ (понекогаш нарекувана и „проклетство на стручноста“). Се случува кога погрешно претпоставувате дека сите знаат онолку колку што вие знаете за одредена тема. Како клинички микробиолог, претпоставував дека сите знаат дека е ужасна идеја да се бакнува новороденче каде било на неговата глава.
Д-р Каран Рај, хирург во NHS, неодамна објави видео на TikTok предупредувајќи за опасностите од бакнување бебе, а судејќи по илјадниците коментари, тоа беше ново за многумина на социјалната мрежа.
Кон крајот на минатата година, британската добротворна организација „The Lullaby Trust“ објави резултати од анкета, според која 54 % од новите и идни родители би им дозволиле на пријателите и семејството да го бакнат нивното новороденче, несвесни за ризикот од сериозна инфекција.
Но, зошто е толку опасно да се бакнува новороденче?
Имунолошкиот систем на бебето не е целосно развиен кога ќе се роди, па ризикот да добие сериозна инфекција е многу поголем.
Во првите три месеци од животот, имунолошкиот систем на новороденчето има помалку вродени клетки за борба со инфекции, како што се неутрофили и моноцити, во споредба со возрасните, што значи дека инфекциите, кои кај возрасните или постарите деца предизвикуваат благи симптоми, кај бебињата можат да бидат опасни по живот.
Еден таков пример е инфекцијата со вирусот херпес. Кај возрасните, херпесот предизвикува ранички на устата, но бебињата можат брзо да се разболат сериозно откако ќе го добијат вирусот. Ако херпесот ги зафати само очите, устата или кожата на бебето, повеќето ќе се опорават по антивирусен третман. Но, ако вирусот стане системски и ги зафати органите на бебето, инфекцијата е многу посериозна и може да биде дури и смртоносна. Колку е помладо бебето, толку е поранливо на инфекција со херпес, особено во првите четири недели по раѓањето.
Родителите на многу мали бебиња не треба да се чувствуваат непријатно да побараат од посетителите да избегнуваат бакнување или допирање на нивното дете. Ако посетителот навистина се грижи за благосостојбата на бебето, не треба да се навреди од ова барање. А родителите не треба да чувствуваат дека претеруваат
Новороденчињата се исто така поранливи на заразни бактерии отколку постарите деца и возрасните и се особено подложни на инфекции со интрацелуларни патогени (бактерии кои можат да навлезат и да преживеат во клетките на организмот домаќин), како што се група Б стрептококи (GBS). Овие бактерии често живеат во гастроинтестиналниот и гениталниот тракт на домаќинот без да предизвикаат болест. GBS инфекциите кај бебињата предизвикуваат сепса, пневмонија, менингитис и инфекции на крвта.
Бебињата се подложни и на инфекции предизвикани од соеви на Ешерихија коли, кои не се штетни за возрасните, но кај нив можат да предизвикаат пневмонија, менингитис и сепса – состојби кои можат да имаат сериозни последици.
Секогаш имајте на ум дека бебињата се многу ранливи на инфекции. Иако бакнувањето е знак на љубов, тоа може сериозно да го разболи новороденчето, а вие би се чувствувале ужасно доколку се случи тоа
Како да покажете љубов – на безбеден начин
Родителите на многу мали бебиња не треба да се чувствуваат непријатно да побараат од посетителите да избегнуваат бакнување или допирање на нивното дете. Ако посетителот навистина се грижи за благосостојбата на бебето, не треба да се навреди од ова барање. А родителите не треба да чувствуваат дека претеруваат.
Најљубезниот гест на секој посетител е да не го изложува бебето на ризик, но ако од некоја причина мора да го бакнете бебето, постојат неколку нешта што можат да го намалат ризикот од инфекција.
Прво, темелно измијте ги рацете. Избегнувајте да го бакнувате бебето во устата или на лицето. Наместо тоа, бакнете го по стапалото или задниот дел на главата. Ако имате активна инфекција од каков било вид, размислете дали навистина треба да го посетите бебето, особено ако е помладо од еден месец.
Инфекциите со херпес се особено сериозни за многу мали бебиња, затоа покријте ги сите ранички со фластер.
Ако не се чувствувате добро, но мислите дека не можете да го одложите посетувањето, носете маска и избегнувајте блиско приближување до новороденчето, особено ако имате респираторна инфекција.
Секогаш имајте на ум дека бебињата се многу ранливи на инфекции. Иако бакнувањето е знак на љубов, тоа може сериозно да го разболи новороденчето – а вие би се чувствувале ужасно ако тоа се случи.
Д-р Примроуз Фристоун
вонреден професор по клиничка микробиологија на Одделот за респираторни науки при Универзитетот во Лестер, Извор: The Conversation
