Се повеќе вести за вирусите, децата се речиси постојано болни цела зима и додека сите родители трагаат за магичен лек кој ќе го заштити здравјето на нивните малечки, тајната всушност лежи во овие шест работи кои треба да станат здрава навика на секое дете. Наместо да купувате скапи сирупи за имунитет, фокусирајте се на овие важни работи кои сигурно ќе му помогнат на вашето дете да го зајакне организмот, но исто така се многу важни за целокупниот развој.
- Добра и балансирана исхрана за посилен имунитет
За да биде силна поддршка на детскиот имунитет, исхраната треба да биде разновидна. Важно е да се вклучи:
- Свежо овошје кое поттикнува функции на имуниот систем (особено јагоди, папаја, црвен грејпфрут, боровинка, кајсија, манго, банана)
- Свеж зеленчук кој придонесува за зајакнување на имунитетот (обрнете посебно внимание на внесот на домати, брокула, спанаќ, сладок компир, морков, кромид и лук)
- Јаткасти плодови, семки и мешунки (здрави масти и цинк)
- Интегрални житарици (сложени јаглехидрати)
- Месо (поради минерали и протеини)
- Риба и маслиново масло (извори на омега-3 незаситени масни киселини)
- Јајца (извор на протеини)
На имунитетот влијае сè што внесуваме во организмот, затоа е важно да се ограничи внесот на шеќер (делува имуносупресивно – го намалува бројот на леукоцити и го забавува формирањето на антитела) и индустриски производи кои имаат адитиви (адитивите често предизвикуваат алергиски реакции кај децата, кои дополнително го ослабуваат имуниот систем).
Децата треба да имаат 5 оброци дневно – три главни оброци и две ужинки.
- Доволната количина сон го зајакнува имунитетот
Истражувањата докажале дека здравиот сон игра клучна улога во зајакнувањето на имунитетот кај децата.
Недостатокот на сон директно влијае на слабеењето на природните бариери на организмот за одбрана од “нападот“ на микробите и другите несакани појави во организмот. На децата им е потребен сон за раст (хормонот за раст најмногу се лачи за време на спиењето) како и за одмор, регенерација и подготовка за нови секојдневни активности.
Бројот на часови зависи од возраста: на новороденчето му требаат 16 часа дневно, на децата од 1 до 3 години им требаат помеѓу 11 и 14 часа сон, додека за децата од предучилишна возраст оптимално е 10 часа сон на ден (8 во текот на ноќта и дневна дремка која трае од еден до два часа), а на постарите деца им требаат најмалку 8 часа сон.
Времето не е единственото мерило за квалитетот на сонот – важно е и кога детето легнува и се буди, како и дали спие мирно. Создавањето на рутина за спиење (одење во кревет и заспивање во приближно исто време секој ден) уште од најмладите денови е клучно за здрав сон и во подоцните години на детето.
- Доволен внес на течности
Уште еден чекор кој ќе придонесе за зајакнување на имунитетот кај децата е доволниот внес на течности. Се препорачуваат околу 8 чаши напивки дневно, пред се во форма на вода, млеко, јогурт и природни сокови.
Млекото и јогуртот се богати со калциум, кој е важен за растот на коските. Освен тоа, ензимите во јогуртот го враќаат дигестивниот тракт во рамнотежа. Избегнувајте газирани пијалаци, како и сите други напивки кои содржат шеќер и вештачки засладувачи.
- Правилна хигиена и имунитет
Иако добрата хигиена не е директно поврзана со зајакнување на имунитетот, нејзината улога е исклучително важна за одржување на здравјето на детето.
Со одржувањето на хигиената, ја намалуваме шансата организмот да дојде во контакт со несакани микроби, бактерии и вируси – главните “непријатели“ на имуниот систем. Редовното миење на рацете (по враќањето дома, пред и после јадење, по играње надвор и галење миленичиња, по одење во тоалет) може да го спречи навлегувањето на овие микроорганизми во телото. И затоа ова е една од најважните хигиенски навики, особено во сезоната на вируси.
- Физичка активност – важен поттик за силен имунитет кај децата
Со поаѓањето во градинка и училиште, бројот на детски обврски се зголемува, па неретко од еден затворен простор (градинка или училиште) да одат во следен затворен простор – автомобил, разни школи за јазици или дома. И така времето поминато на свеж воздух и во опуштена игра во текот на есента или зимата се намалува.
А престојот на свеж воздух, како и физичката активност, исто така се неопходни за силен имунитет и здрав организам. И затоа, соодветно облечени, обидете се да им обезбедите на своите деца и себеси барем 30 минути на чист воздух и уживајте во благодетите од пешачењето.
Освен тоа, би било добро детето да има некоја друга форма на рекреација (пливање, ролерки, танцување, трчање, спортови со топка), бидејќи се препорачува за правилен развој на телото, моторни вештини, здравје, квалитетен сон и е дополнителен поттик за зајакнување на имунитетот.
