Во првата година од животот развојот на бебето се одвива многу брзо, а за неколку месеци детето учи да се врти од стомак на грб и обратно, да седи, да лази, а потоа да оди.
Овој период ги претставува и најважните пресвртници во развојот во првата година од животот, а физиотерапевтот и експерт за развој на грубата моторика кај децата, д-р Мариса Арон, открива како можете да му помогнете на вашето дете да ги достигне овие пресвртници.
Ова се нејзините препораки за здрав раст и развој на бебето.
1. Умерено користете детска опрема
Денес на пазарот има многу опрема за бебиња, разни помагала, а родителите грешат купувајќи ги и користејќи ги во изобилство.
„Ќе бидам многу јасна – ништо од ова не е добро за бебето, нема проодувалки, лулашки, скокалки… тие работи се тука за да ви помогнат вам, а не на вашето дете. И јас целосно го разбирам тоа, кога треба да зготвите ручек или да се туширате, користете го она што ви помага. Но, секогаш кога е можно, одберете детето да лежи на рамна површина“, посочува д-р Арон и додава:
„Менувајте ја положбата на бебето на неколку минути, оставете го да лежи на грб, па на страна, па на стомак. Носилките се исто така одлична алтернатива бидејќи поттикнуваат контрола на главата и вратот, а ги оставаат рацете слободни“.
2. Покажете му на вашето бебе како
Имајте на ум дека вашето бебе воопшто не знае дека постои превртување од стомак на грб, а уште помалку како да го направи тоа. Обидете се физички да го свртите бебето кога вообичаено ќе го свртите од грб на стомак и обратно (многу подобро е да го свртите наместо да го кревате, потоа да го вртите во воздух и потоа да го спуштите).
Истото важи и за кревање на рацете нешто да дофати, за чекорите и се останато. Кога детето е подготвено за следниот чекор, каков и да е, покажете му неколку пати како да го направи тоа, советува физиотерапевтот.
3. Обрнете внимание на симетријата
“Кога вашето бебе ќе достигне нова развојна пресвртница, погрижете се да правите сè на двете страни, лево и десно. Ако забележите дека детето прави нешто експресивно само од едната страна, постои причина за тоа. Во овој случај, намерно ставете ја играчката на спротивната страна за да го поттикнете симетричниот развој“, вели д-р Арон.
Таа истакнува дека ова е важно за оптимален развој на мозокот, координација, рамнотежа и стабилност. Доколку асиметријата не се подобри за неколку недели, консултирајте се со физијатар.
4. Верувајте му на вашето чувство
Ако нешто ве загрижува, а сите ви велат „само почекај, ќе видиш“, „ќе порасне“, „ќе го направи тоа кога ќе биде подготвено“, верувајте во себе и барајте одговори на она што ве загрижува. Ако се покаже дека не е ништо, ќе ви биде полесно, а ако се утврди дека има проблем, подобро е да го решите што е можно поскоро.
5. Не двоумете се да побарате помош
Ако бебето има потешкотии во нешто, не двоумете се да побарате помош и совет од физијатар или физиотерапевт, професионален терапевт, логопед или друг квалификуван специјалист. На овој начин ќе му помогнете на вашето дете побрзо да ги надмине тешкотиите и на најдобар можен начин да ги достигне сите пресвртници во развојот.
