Летните излети и денови на плажа можат многу лесно да ги расипат осите. Експертите велат дека тие не „напаѓаат“ сè додека не се почувствуваат загрозено или додека не го допрете нивното гнездо. Исто како и кај пчелите, само женка може да ве „боцне“, но за разлика од нив, истата оса може да ве касне и неколку пати.
-
За воопшто и да не дојде до убод, избегнувајте да ставате парфеми и мириси, како и да носите шарена облека која ги привлекува осите. Ако се најдете во нивна близина, останете мирни. Никогаш не допирајте го осиното гнездо!
Ако, сепак, немате среќа и дојде до убод, осиниот отров може да создаде отоци и болки, но и анафилактички шок доколку сте алергични. Некои од симптомите се чешање, вртоглавица, гадење и повраќање, болки во стомакот, низок крвен притисок.
Измијте го пределот на убодот со сапун и вода, ставете мраз или ладна облога околу десет минути за да го намалите отокот. Избегнувајте да се чешате и да го допирате местото на убод за да избегнете инфекција. Исто така, немојте да ставате никакви препарати како масла, креми, оцет, гелови. Ако се појават посилни симптоми, задолжително јавете се на лекар, пишува „The Sun“.
