♦♦♦♦♦♦♦
Дури и деца со благи или никакви симптоми можат да го шират COVID-19, според податоците за следење на контактите од три установи за згрижување на деца во Јута, официјално објавени во петокот.
Дванаесет деца, вклучително и едно осуммесечно дете, добиле COVID-19 во установите за згрижување деца и го рашириле на најмалку 12 лица надвор од установите. Податоците покажуваат дека децата можат да го донесат вирусот од установите за згрижување до нивните домови, напишаа истражувачите во извештајот објавен од Американскиот центар за контрола и превенција на болести (CDC).
Шест од овие надворешни случаи биле мајки на заразените деца, додека други три биле брат или сестра. Една мајка морала да биде хоспитализирана. Нејзиното дете било едно од асимптоматските носители на коронавирус. Уште едно од трите асимптоматски деца исто така го пренело вирусот.
-
На половина милион деца во Америка досега им е дијагностициран коронавирус, со раст од 16% во периодот од 20 август до 3 септември, според Американската академија за педијатрија и Здружението на детски болнички установи
Иако се чини дека мал број од децата имаат сериозна форма на болеста за разлика од возрасните, прашање кое е особено битно за оние кои ги носат одлуките за повторно отворање на училиштата и дневните центри, е токму каква улога имаат децата во пренесувањето на вирусот. Извештајот на CDC сугерира дека тие можат и го шират коронавирусот.
Истражувачите анализирале податоци за следење на контакти од 184 лица поврзани со три установи за згрижување деца во Солт Лејк Сити од април до јули. Откриле најмалку две деца кои немале никакви симптоми, и кои не само што го фатиле вирусот, туку и го пренеле на други луѓе. Осуммесечно бебе ги заразило обајцата родители.
Истражувачите велат дека две од епидемиите во установите започнале со членови на персоналот кои имале контакти во заразени членови на домаќинството.
„COVID-19 е помалку сериозен кај децата отколку кај возрасните, но децата сè уште можат да играат улога во неговото пренесување“, напишаа истражувачите.
„Инфицираните деца изложени во овие три установи имаа лесни симптоми или беа без симптоми. Две од три асимптоматски деца го пренеле SARS-CoV-2 на нивните родители, а можеби и на нивните наставници“.
Педијатрите претходно истакнаа децата можат да помогнат во ширењето на вирусот.
„Знаеме дека децата честопати покажуваат малку или немаат симптоми на COVID-19. Ние исто така знаеме дека тие не се имуни на вирусот и можат да се разболат сериозно“, рече д-р Сали Гоза, претседател на Американската академија за педијатрија, во претходна изјава.
Две од епидемиите во установите започнале со членови на персоналот кои имале контакти во заразени членови на домаќинството
Истражувачите велат дека следењето на контактите и навременото тестирање на COVID-19 за оние во установите за згрижување деца, вклучително и асимптоматските лица, можат да помогнат да се спречи ширењето на вирусот. Тие препорачуваат употреба на заштитни маски за лице, особено за персоналот што работи во центрите со деца под 2-годишна возраст, кои се премногу млади за да носат маски.
Во август, јужнокорејските истражувачи објавија дека децата, дури и оние без симптоми, можат да го носат коронавирусот во носот и грлото со недели. Друга студија покажа дека децата помлади од 5 години имаат помеѓу 10 и 100 пати повеќе генетски материјал од коронавирусот во нивните носови отколку постарите деца и возрасните. (Си-ен-ен)
