♦♦♦♦♦♦♦
Правилната исхрана има огромно значење во здравиот развој на бебето. Кога се почнува со воведување на дополнителна храна покрај мајчиното млеко или вештачката исхрана (адаптирана формула)? Кој е принципот на воведување на нова храна во менито на бебето?
ПИШУВА:
Д-р Бујар Абдиу
специјалист педијатар
♦♦♦♦♦♦♦
Правилната исхрана на доенчето (во првата година од животот) има голема улога во заштитата и одржувањето на здравјето, како и на психолошкиот развој на детето. Со адекватна исхрана доенчето најбрзо се развива и напредува. Таа може да биде природна (доење), комбинирана и вештачка. Мајчиното млеко е најдобрата и незаменлива храна за доенчето, бидејќи е прилагодено на потребите на бебето. Освен што се обезбедува природна исхрана со доењето се остварува и те како значајна врска меѓу мајката и бебето, емоционална стабилност и стимулирање на имунитетот. Мајчиното млеко е бактериолошки исправно и стерилно, а цицањето како акт овозможува правилен развој на вилицата.
Комбинираната и вештачката исхрана се користат кај доенчињата чии мајки или немаат доволно млеко или поради некоја болест не можат да дојат. Во тој случај се користат адаптирани млека кои по својот состав се најслични на мајчиното млеко. Употребата на кравјо млеко не е препорачлива поради можните бактериолошки неисправности, алергиите или неподносливоста.
Иако во светот има различни пристапи и мислења во поглед на воведувањето на дополнителна храна, според препораките на СЗО, но и од лично искуство мислам дека кај доенчиња кои добро напредуваат исхраната треба да се базира исклучиво на доење во првите 4-5 месеца. Дури потоа новите намирници да се воведуваат постепено една по една и секако во мали количини (една до две лажички, постепено и секогаш само еден вид). Навикнувањето на секој нов вид на храна треба да трае една недела и притоа доенчето не треба да се присилува да јаде, бидејќи се соочува со нов вкус, така што во случај на одбивање треба да се пробува и следните денови со истиот вид на храна.
Поради можна појава на алергиски реакции во првата година од животот не би требало да се даваат: шумски плодови (јагоди, малини, капини, боровинки и рибизла), цитрусно овошје (лимон, грејпфрут, портокали, мандарини, киви) костенливи плодови (ореви, лешници и бадеми), чоколада, еурокрем, мед, квасец, риба, школки, белка од јајце, кравјо млеко, храна со конзерванси итн.
Првично се почнува со овошја во облик на компот или кашички без додаток на шеќер, и тоа првично со јаболко, банана, круша итн. Од зеленчук прво каша од морков, потоа компир, ориз, броколи, па каши од житарки. Може да се воведе и супа од немасно месо и пилешка супа (бујон), јогурт итн., а дури после 7. месец може да се почне постепено со месо, жолчка од јајце итн.
Најважно како совет за родителите би спомнал дека поради можна појава на алергиски реакции во првата година од животот не би требало да се даваат: шумски плодови (јагоди, малини, капини, боровинки и рибизла), цитрусно овошје (лимон, грејпфрут, портокали, мандарини, киви) костенливи плодови (ореви, лешници и бадеми), чоколада, еурокрем, мед, квасец, риба, школки, белка од јајце, кравјо млеко, храна со конзерванси итн.
ПОВЕЌЕ ОД ИСТИОТ АВТОР, Д-Р БУЈАР АБДИУ, СПЕЦИЈАЛИСТ ПЕДИЈАТАР:
