Точно во 9 часот, противпожарното возило ги вклучи сирените и го најави доаѓањето на Дедо Мраз, кој годинава поради пандемијата новогодишните пакетчиња ги донесе користејќи пожарникарски скали
Хо, хо, хо… Дедо Мраз денеска донесе новогодишна радост на Детската клиника – во пресрет на новогодишните празници утрово, Бригадата за противпожарна заштита на Град Скопје заедно со Министерот за здравство д-р Венко Филипче, на еден поинаков начин ги израдуваа децата хоспитализирани на Универзитетската клиника за детски болести.
Точно во 9 часот, противпожарното возило ги вклучи сирените и го најави доаѓањето на Дедо Мраз, кој годинава поради пандемијата новогодишните пакетчиња ги донесе користејќи пожарникарски скали. Министерот Филипче ги пречека подароците на терасата на Клиниката и им ги подели на децата, информираа од Министерството за здравство.
Филипче кој традиционално присуствува на предновогодишниот настан за најмалите пациенти, на децата и нивните родители им посака среќна Нова Година исполнета со безгрижност и радост, што поскоро да оздрават и да се вратат дома кај своите семејства.
