Децата обично почнуваат да ги грицкаат ноктите бидејќи им е здодевно, поради имитирање на врсниците, бидејќи се возбудени, несигурни или чувствуваат нелагодност. А, токму поради чувството на нелагодност грицкањето нокти може да премине во навика. Со грицкањето нокти детето настојува да го ублажи стресот што го чувствува. И мали причини може да бидат причина за појава на голема нелагодност или анксиозност кај децата.
ОПОМЕНИТЕ И КАЗНИТЕ НЕМААТ ЕФЕКТ
За да се реши овој проблем, првоо треба да се утврди причината зошто тој воопшто се случува. Ако родителот знае што би можело да биде причина за оваа навика, би било добро да се обиде да поразговара со детето за тоа што го мачи.
Она што е важно да се нагласи е дека казнувањето или опоменувањето поради грицкањето нокти немаат никаква смисла. Причината е таа дека детето тоа го прави несвесно, а дополнителниот притисок може само да ја потенцира таа навика. Ниту мачкањето на ноктите со средства кои би требало да го спречат детето да ги грицка ноктите, не е секогаш правото решение, бидејќи детето има чувство дека се казнува.
ШТО СЕПАК МОЖЕТЕ ДА НАПРАВИТЕ?
Она што родителите можат да го направат е да водат сметка за хигиената на ноктите, редовно да ги сечат за дететео да не добие нагон да ги изгриза пораснатите делови, како и да му го насочат вниманието на нешто друго.
Може да му понудите некоја играчка, да му го насочите вниманието на омилената активност, како што е боење или да му понудите нешто за грицкање, како јаболко, или некој здрави грицки. Важно е и на детето да му обезбедите доволно игра на отворено, бидејќи тоа го ублажува стресот и нервозата, и му овозможува да ја потроши вишокот енергија.
