Многу родители му дозволуваат на своето дете да гледа песнички, цртани или некои видеа на телефон или ТВ за да јаде подобро. Иако оваа тактика им го олеснува хранењето на мајките и татковците бидејќи детето не се буни додека јаде, нема тензија „ајде уште ова залче“ и слично, експертите предупредуваат дека тоа воопшто не е добро.
Користењето телефони и други екрани на маса навистина има бројни лоши ефекти, а само еден од нив е дека децата кои се хранат на овој начин се повеќе склони кон прејадување и дебелеење, бидејќи нивниот мозок не внимава што и колку јадат, туку на екранот, па не им праќа сигнал кога е доволно храна.
Гледањето на екраните за време на оброците исто така ја намалува концентрацијата на децата, им ја одзема можноста да научат да разликуваат здрава и помалку здрава храна, а да не зборуваме дека го ставате детето во ситуација утре да не сака да јаде без некоја дополнителна забава – која нема секогаш да ја има при рака.
Значи, факт е дека никако не е добро детето додека јаде да гледа во било каков екран, но ако веќе се навикнало на тоа и сега не знаете како да му дадете да јаде без неговата омилена песничка или цртан филм, еве неколку совети кои можат да ви помогнат да го одвикнете.
- Дајте му алтернатива
Обидете се да му раскажете на детето приказна, бајка, испејте песничка или кажувајте му за вашите искуства од детството. Можете исто така да разговарате со него зошто секоја намирница што ја јаде е добра и здрава, но секако, треба да му ја претставите на детето на некој интересен начин – на пример, како и Попај јаде спанаќ и затоа е силен и слично.
- Покажете му нови начини за интеракција на масата
Не заборавајте дека личниот пример и надзорот се многу важни за да всадите здрави прехранбени навики кај вашето дете кои ќе му останат кога ќе порасне, затоа искористете ги оброците токму за тоа.
- Избегнувајте казни
Детето на почетокот може да има тантруми кога ќе воведете нови правила и ќе сфати дека нема повеќе телефони на масата, но тоа е очекувано ако е навикнато секогаш да јаде со екран. Избегнувајте да го казнувате поради ова и обидете се да одржите позитивен став, да бидете смирени и ќе видите колку полесно детето ќе ја помине оваа промена.
- Поставете граници за користење на екран
Поставете јасни правила за тоа кога, каде и колку детето може да биде изложено на екрани, без разлика дали се работи за телевизор, телефон или таблет. Објаснете му кои се причините за поставување на граници, бидејќи има многу поголеми шанси така да ги прифати, но и со какви последици ќе се соочи доколку не ги почитува правилата.
- Исклучете го интернетот додека јадете
На овој начин детето ќе биде принудено да развие нови навики и да се угледа на вас. Покажете му на вашето дете дека е забавно да јаде и без да гледа во екран.
