![truenje-hrana (1)](https://pedijatar.mk/wp-content/uploads/2024/07/truenje-hrana-1-696x464.jpg)
Труењето со храна е состојба предизвикана од консумирање на контаминирана храна или пијалак што содржи бактерии, вируси или паразити. Вообичаени бактерии кои предизвикуваат труење со храна се салмонела, ешерихија коли и листерија.
Труењето со храна предизвикува симптоми како што се повраќање, гадење, треска и грчеви. Симптомите може да се појават во рок од неколку часа по консумирање на контаминирана храна или до една недела подоцна. Тие можат да траат од околу 24 часа до околу една недела. Труењето со храна обично поминува само или со помош на домашни лекови. Сепак, некои луѓе може да дехидрираат, што може да ги влоши симптомите.
Симптоми
Токсините што ги ослободуваат бактериите во телото предизвикуваат труење со храна. Симптомите на труење со храна се многу слични на симптомите на стомачниот грип, кој е резултат на вирусна болест. Симптомите на труење со храна вклучуваат:
- мачнина,
- дијареја, која може да биде крвава,
- повраќање,
- стомачни болки или грчеви,
- треска,
- главоболка.
Симптомите кај доенчиња и деца може да бидат:
- промени во расположението, како што е зголемена раздразливост,
- недостаток на енергија,
- дијареја која трае повеќе од 24 часа,
- чести течни столици или повраќање.
Симптоми на дехидрација
Доенчињата и децата помлади од 5 години се изложени на поголем ризик од труење со храна и развој на потешки симптоми, како и возрасните над 65 години, трудниците и лицата со ослабен имунолошки систем
Важно е да се препознаат симптомите на дехидрација бидејќи таа може да биде последица на труење со храна поради повраќање, дијареја, треска или поради тоа што лицето не пие доволно течности. Симптоми на дехидрација се:
- силна жед,
- сува уста,
- сува кожа,
- поретко мокрење или послабо потење,
- потемна боја на урината,
- замор,
- вртоглавица.
Меѓу потешките симптоми на дехидрација може да бидат: забрзано дишење или забрзано чукање на срцето, поретко мокрење, збунетост и несвестица.
Ако некое лице има посериозни симптоми на труење со храна, веднаш треба да побара лекарска помош. Во тешки симптоми на труење со храна влегуваат: промени во менталната состојба, како што се збунетост, шест или повеќе епизоди на дијареја во еден ден, дијареја која трае повеќе од три дена, неможност да се задржат течности поради честото повраќање, силна абдоминална или ректална болка, црна столица и висока температура.
Симптоми кај децата
Пациенти кои доживуваат труење со храна во 40 % од случаите се деца. Труењето со храна може да биде опасно за децата бидејќи може да имаат потешки симптоми. Доенчињата и децата на возраст под 5 години немаат целосно развиен имунолошки систем, па затоа имаат помала способност да се борат со бактериите кои најчесто предизвикуваат труење со храна. Симптомите на труење со храна кај доенчиња и деца често се слични на симптомите кај возрасните, а тоа се:
- дијареја,
- гадење,
- болки во стомакот,
- повраќање.
Посериозни симптоми кај доенчиња и мали деца може да бидат:
- висока температура,
- силна абдоминална или ректална болка,
- црна столица,
- столица со крв или гној,
- главоболка,
- заматен вид,
- трнење,
- вкочанетост.
Дехидрацијата поврзана со труење со храна може да предизвика различни симптоми кај доенчињата и децата, како што се: сува уста или јазик, плачење без солзи, неможност за мокрење најмалку три часа, поспаност, раздразливост и висока температура.
Ако доенчето или детето ги почувствува овие симптоми, важно е веднаш да побарате лекарска помош.
Ботулизам кај доенчиња
Доенчињата може да добијат ботулизам ако изедат спори на бактерии во почвата или медот. Ова е причината зошто бебињата под една година не треба да јадат мед во која било форма. Знаците на ботулизам кај доенчиња бараат итна медицинска помош. Симптомите може да бидат:
- слаб или поинаков плач,
- недостаток на израз на лицето,
- запек,
- незаинтересираност за храна,
- зеници кои не реагираат нормално на промените во светлината,
- птоза (спуштени очни капаци),
- потешкотии со дишењето.
Кога на лекар?
Ако некое лице чувствува тешки симптоми на труење со храна или симптоми на дехидрација, неопходно е да се консултира со лекар. Исто така, важно е да се побара лекарска помош ако лицето не може да задржи храна или течност во тек на неколку дена или ако се работи за жена која е бремена. Доенчињата и децата помлади од 5 години се изложени на поголем ризик од труење со храна и развој на потешки симптоми, како и возрасните над 65 години, трудниците и лицата со ослабен имунолошки систем.